کوئٹہ: وزیراعلی بلوچستان میر سرفراز بگٹی نے کہا ہے کہ بلوچ علیحدگی پسند تحریک کا انجام بھی کرد تحریک والا ہوگا، گڈ اور بیڈ عسکریت پسندوں کا فرق ختم ہوگیا ہے،ہمارے باغی افغانستان میں حکومتی سرپرستی میں رہ رہے ہیں، یہ قومی اور حقوق کی جنگ نہیں، آخر کب تک ہم نوجوانوں کو اس آگ اور خون کے دریا میں دھکیلیں گے، قتل وغارت سے بالاخر نقصان بلوچ قوم کا ہو رہا ہے۔کوئٹہ میں وکلاء برادری کی تقریب سے خطاب کرتے ہوئے میر سرفراز بگٹی نے کہا کہ پاکستان دنیا کا واحد ملک ہے جو علیحدگی پسند تحریکیوں کو برداشت کرتا ہے جس جنگ میں بلوچستان کو دھکیلا گیا ہے، وہ لاحاصل ہے، مجھے نہیں لگتا کہ ملک کو تشدد کے ذریعے توڑا جاسکتا ہے۔
انہوں نے کہا کہ آئین پاکستان کے مطابق بلوچستان کو حقوق مل رہے ہیں، ہمیں توڑنے کیلئے مائنڈسیٹ پر کام کیا جا رہا ہے، ایسی تاریخ بتائی جا رہی ہے جس کا تاریخ سے کوئی تعلق ہی نہیں ہے ۔ انہوں نے کہا کہ تاریخ کو ہم نے اپنی مرضی سے مسخ کیا ہے۔
انہوںنے کہا کہ اپنے دل کی بات وکلا برادری سے ضرور کرنا چاہوں گا، ملک کو توڑنے کیلئے دانشور طبقے پر کام کیا جا ری ہے جس ایما پر پاکستان کو توڑا جا رہا تھا اس کا جو حشر ہوا وہ سب کے سامنے ہے۔ انہوں نے کہا کہ بیانئے کے سچ اور حق ہونے کا فیصلہ آپ نے کرنا ہے ہمارے باغی افغانستان میں حکومتی سرپرستی میں رہ رہے ہیں، گڈ اوربیڈ عسکریت پسندوں کا فرق ختم ہوگیا ہے جس نے بندوق اٹھائی ہے وہ پہلے دن پاکستان کو توڑنے کی بات کر رہا ہے، قتل وغارت سے بالاخر نقصان بلوچ قوم کا ہو رہا ہے، کیا ہمار کلچر اجازت دیتا ہے کسی مزدور کو قتل کر دیں۔
انہوںنے کہا کہ بلوچ علیحدگی پسند تحریک کا انجام بھی کرد تحریک والا ہوگا، علیحدگی پسندی کیلئے ترقی نہ ہونے کی دلیل غلط ہے، یہ قومی اور حقوق کی جنگ نہیں، آخر کب تک ہم نوجوانوں کو اس آگ اور خون کے دریا میں دھکیلیں گے، اس لاحاصل جنگ پر دانشوروں کو بات کرنی چاہئے۔
انہوںنے کہا کہ ہم قانون کی بالادستی پر یقین رکھتے ہیں، قانون کی حکمرانی سے عوام کے مسائل کا حل ممکن ہے،امن وامان برقرار رکھنا ہماری ذمہ داری ہے۔
