راولپنڈی: ڈی جی آئی ایس پی آر لیفٹیننٹ جنرل احمد شریف چودھری نے کہاہے کہ بھارتی الزامات مضحکہ خیز ہیں، جارحیت کے جواب میں چھوٹے ہتھیاروں سے جواب دے رہے ہیں، بھارت دہشت گردی کی ذمہ داری ہمیشہ پاکستان پر ڈال کر سیاسی فوائد حاصل کرتاہے، پہلگام واقعے کے ثبوت ہیں تو کسی غیر جانبدار ملک کو پیش کرے۔
غیر ملکی میڈیا سے گفتگو کرتے ہوئے ڈی جی آئی ایس پی آر لیفٹیننٹ جنرل احمد شریف چودھری نے کہا کہ پاکستان بے بنیاد بھارتی الزامات کو مکمل طور پر مسترد کرتا ہے، پہلگام میں سیاحوں پر حملے کے بعد حکومت پاکستان نے ذمہ داری کا مظاہرہ کیا، حکومت پاکستان نے آزادانہ اورغیر جانبدارتحقیقات کی پیش کش کی، بھارت نے پاکستان کی یہ پیشکش قبول کرنے سے انکار کر دیا۔
انہوں نے کہا کہ بھارت ہمیشہ دہشتگردی کی ذمہ داری پاکستان پر ڈال کر سیاسی فائدے کی کوشش کرتا ہے۔ ڈی جی آئی ایس پی آر نے کہا کہ بھارت نے پاکستان پر حملہ بغیر کسی قابل اعتبار ثبوت 6مقامات پر حملے کرکے عام شہریوں کو نشانہ بنایا جس میں خواتین اور بچوں سمیت متعدد شہری شہید و زخمی ہوئے۔
انہوں نے کہا کہ بھارت کی جانب سے پاکستان پر بغیرثبوت الزام کا سلسلہ بندہونا چاہئے، اگر کوئی ثبوت ہیں تو کسی غیر جانبدارملک کو پیش کرے۔ انہوں نے کہا کہ بھارت کی جانب سے فائرنگ کا سلسلہ مسلسل جاری ہے،پاکستان صرف چھوٹے ہتھیاروں سے جواب دے رہا ہے، ڈرون، راکٹ یا بڑے حملے نہیں کئے جا رہے۔
انہوں نے کہا کہ پاکستان کی جوابی کارروائی صرف دفاعی نوعیت کی ہے۔انہوں نے کہا کہ بھارتی میڈیا پر مکمل ایک مہم چلائی جارہی ہے ،گزشتہ رات بھی ایک سنسنی پھیلائی گئی کہ پاکستان نے ڈرون، طیارے اور بین الاقوامی سرحد پر بڑے پیمانے پر حملے کئے ہیں، یہ سراسر جھوٹ پر مبنی پروپیگنڈا ہے جس کے کوئی ثبوت موجود نہیں، یہ بہت مضحکہ خیز ہے۔
