اسلام آباد: وفاقی وزیر اطلاعات عطا اللہ تارڑ نے کہا ہے کہ رات کی تاریکی میں حملہ کرنیوالے بزدل دشمن نے جوابی وار پر سفید جھنڈا لہرا کر شکست تسلیم کرلی، عورتوں، بچوں، مساجد کو نشانہ بنانا جنگی اخلاقیات کی خلاف ورزی ہے، عالمی دہشت گرد نے کم ظرفی کا مظاہرہ کیا، دشمن کی جارحیت کا کئی گنا زیاد ہ جواب دیاہے، قوم افواج پاکستان کے شانہ بشانہ کھڑی ہے۔بدھ کو بھارتی حملے اور افواج پاکستان کی جانب سے دندان شکن جواب کے بعد میڈیا سے گفتگو کرتے ہوئے عطاء تارڑ نے کہا کہ بھارت نے رات کی تاریکی میں نہتے شہریوں ، عورتوں، بچوں اور مساجد کو نشانہ بنایا ، اقدام جنگی اخلاقیات کی کھلی خلاف ورزی ہے۔
انہوں نے کہا کہ ہماری بہادر افواج نے دلیری سے دشمن کا مقابلہ کیا اور جارحیت کا کئی گنا زیادہ جواب دیا۔ انہوں نے بتایا کہ پاکستان نے دشمن کے پانچ جنگی طیارے اور ایک ڈرون مار گرایا جبکہ لائن آف کنٹرول پر متعدد بھارتی پوسٹیں بھی تباہ کردی ہیں، بھارتی میڈیا نے بھی اپنی شکست تسلیم کرتے ہوئے گرائے گئے طیاروں کا ملبہ دکھایا ہے۔
انہوں نے کہا کہ پاکستان نے پہلگام واقعہ کی تحقیقات کا کہا مگر بھارت اس سے بھاگا، آج بھی حملے کے بعد بھارت اسی طرح بھاگا ہے ۔ انہوں نے کہا کہ پاکستان کی مسلح افواج نے صرف جنگی اہداف کو نشانہ بنایا، کسی شہری کو نہیں کیونکہ ہماری مسلح افواج پیشہ ورانہ اصولوں کی مکمل پابند ہیں۔
انہوں نے کہا کہ جنگ کے بھی آداب ہوتے ہیں، دشمن بھی ہو تو شہریوں کو نشانہ بنا کر کم ظرفی نہیں ہونی چاہئے ۔ انہوں نے بتایا کہ آج صحافیوں کے وفد کو مریدکے اور بہاولپور لے جانے کا منصوبہ تھا تاکہ عالمی میڈیا کو دکھایا جا سکے کہ ان علاقوں میں کسی قسم کے دہشت گرد کیمپ موجود نہیں ہیں۔ انہوں نے واضح کیا کہ پاکستان دہشت گردی کے خلاف جنگ میں فرنٹ لائن سٹیٹ ہے جس نے 90ہزار سے زائد قیمتی جانوں کی قربانی دی ہے۔
انہوں نے کہا کہ بھارت عالمی دہشت گرد ہے وہ امریکہ، آسٹریلیا اور کینیڈا میں سکھوں کے قتل میں ملوث پایا گیا ہے جبکہ کلبھوشن یادیو جیسے دہشت گرد کو پاکستان میں گرفتار کیا گیا جو تخریبی سرگرمیوں میں ملوث تھا۔
انہوں نے کہا کہ بھارت کے پاس نہ دلیل ہے نہ ثبوت ،پہلگام واقعہ کی ایف آئی آر صرف دس منٹ بعد درج کی گئی جبکہ پولیس ڈیڑھ گھنٹے بعد جائے وقوعہ پر پہنچی۔ انہوں نے کہا کہ پوری قوم افواج پاکستان کے شانہ بشانہ کھڑی ہے، ہم نے عالمی میڈیا کے سامنے پاکستان کا موقف واضح طور پر رکھا جبکہ بھارت کا بیانیہ کہیں نظر نہیں آیا۔ انہوں نے کہا کہ رات گئے بھارت بدنیتی سے آیا تھا مگر جب مقابلہ پڑا تو دم دبا کر بھاگا اور سفید جھنڈا لہرانے پر مجبور ہوگیا۔
