اسلام آباد: نائب وزیراعظم و وزیر خارجہ سینیٹر محمد اسحاق ڈار نے بھارت کی اشتعال انگیز کارروائیوں، بے بنیاد الزامات، اشتعال انگیز پراپیگنڈے اور سندھ طاس معاہدے کو یکطرفہ طور پر معطل کرنے جیسے اقدامات کو سختی سے مسترد کرتے ہوئے کہا ہے کہ یہ اقدامات بین الاقوامی قوانین اور معاہدے کی کھلی خلاف ورزی ہیں۔
ان خیالات کا اظہار انہوں نے ملائیشیا کے وزیر خارجہ داتو سری محمد حسن سے ٹیلیفونک گفتگو کے دوران کیا۔ڈپٹی وزیراعظم نے علاقائی امن و استحکام کے لیے پاکستان کے عزم کا اعادہ کیا، تاہم واضح کیا کہ پاکستان اپنی خودمختاری اور قومی مفادات کے تحفظ کا پورا حق محفوظ رکھتا ہے۔
اس موقع پر علاقائی صورتحال اور حالیہ پیش رفت پر تبادلہ خیال کیا گیا،دونوں رہنماوں نے بدلتی ہوئی صورتحال پر قریبی رابطے میں رہنے پر اتفاق کیا۔ ملائیشین وزیر خارجہ داتو سری محمد حسن نے پاکستان کے موقف کی حمایت کی اور تمام فریقین پر تحمل سے کام لینے کی اپیل کی۔
