اسلام آباد: صدر آصف زرداری نے صحافیوں کو محفوظ و سازگار ماحول کی فراہمی کیلئے مزیداقدامات کی ضرورت پر زور دیتے ہوئے کہا ہے کہ مکالمے کے فروغ ، سماجی، اقتصادی ،ماحولیاتی اہمیت کے مسائل اجاگر کرنے، بدعنوانی بے نقاب ،پسماندہ طبقات کیلئے آواز بلند کرنے میں میڈیا کا کردار ناگزیر ہے، صحافی اعلی صحافتی معیار، خبروں میں درستگی اور پیشہ ورانہ مہارت کو برقرار رکھیں۔
آزادی ِصحافت کے عالمی دن پر جاری بیان میں صدر مملکت نے آزاد اور ذمہ دار پریس کے فروغ کے عزم کا اعادہ کرتے ہوئے کہا کہ آج ہم سچائی کی تلاش خاص طور پر جنگ زدہ علاقوں جیسا کہ غزہ اور فلسطین، میں رپورٹنگ کے دوران اپنی جانیں گنوا دینے والے صحافیوں کو خراج ِتحسین پیش کرتے ہیں، ان کی جرات اور لگن ہمارے لئے مشعل راہ ہے۔
صدر نے کہا کہ آئین پاکستان کا آرٹیکل 19چند ضوابط کے تحت آزادی اظہار اور آزاد صحافت کی ضمانت دیتا ہے، مکالمے کے فروغ ، سماجی، اقتصادی اور ماحولیاتی اہمیت کے مسائل اجاگر کرنے، بدعنوانی بے نقاب کرنے اور پسماندہ طبقات کیلئے آواز بلند کرنے میں میڈیا کا کردار ناگزیر ہے، اگرچہ ہم نے صحافیوں کے تحفظ اور فلاح و بہبود کے لیے بہت سے اقدامات لئے تاہم انہیں محفوظ اور سازگار ماحول فراہم کرنے کیلئے ابھی مزید اقدامات کی ضرورت ہے۔
انہوں نے کہا کہ ایک ایسا کلچر جہاں صحافی خوف اور ہراس کے بغیر اپنے فرائض سرانجام دینے میں خود کو محفوظ محسوس کریں وقت کی ضرورت ہے۔ انہوں نے کہا کہ صحافی اعلی صحافتی معیار، خبروں میں درستگی اور پیشہ ورانہ مہارت کو برقرار رکھیں، عوام کے اعتماد کو مجروح کرنے والی جعلی خبروں، غلط معلومات اور سنسنی کے ماحول کے پیش ِنظر میڈیا کی ذمہ داری اور بھی بڑھ گئی ہے۔
انہوں نے کہا کہ شہریوں کے حقوق اور ذمہ داریوں اور سماجی و اقتصادی مسائل بارے آگاہی ، شہری تعلیم کے فروغ ، اور جمہوری عمل میں عوام کی شرکت کی حوصلہ افزائی میں میڈیا کا ایک اہم کردار ہے۔
انہوں نے کہا کہ صحافیوں کو عوام اور سرکاری اداروں کے درمیان پل کا کردار ادا کرنا چاہئے اور بے آواز لوگوں کی آواز بننا چاہئے۔ انہوں نے کہا کہ امید ہے حکومت آزادی صحافت اور صحافیوں کے تحفظ، وقار اور آزادی کو یقینی بنانے کیلئے کام جاری رکھے گی۔
