راولپنڈی: سیکیورٹی فورسز نے خیبر پختونخوا کے مختلف علاقوں میں 3الگ کارروائیوں میں 5 خوارج کو جہنم واصل ،2کو گرفتار کرلیا ۔ آئی ایس پی آر کی جانب سے جاری بیان کے مطابق 30اپریل اور یکم مئی کو خیبر پختونخوا کے مختلف علاقوں میں سیکیورٹی فورسز نے 3الگ الگ کارروائیوں میں5خوارج کو ہلاک ،2 کو گرفتار کیا۔
بیان کے مطابق ضلع باجوڑ میں خفیہ اطلاعات پر کئے گئے آپریشن میں خوارج کے ٹھکانے کو موثر انداز میں نشانہ بنایا گیا،شدید فائرنگ تبادلے میں3خوارج ہلاک ہوئے جن میںایک اعلی قدر کا ہدف خارجی فرید اللہ بھی شامل تھا۔
آئی ایس پی آر کے مطابق شمالی وزیرستان کے علاقے دوسالی میں خفیہ آپریشن کے دوران فائرنگ تبادلے میں 2خوارج کو جہنم واصل کیا گیا جبکہ مہمند میں سیکیورٹی فورسز نے خارجی ٹھکانے پر کامیاب چھاپہ مار کر 2خوارج کو گرفتار کر لیا جن میں ایک ہائی لیول خارجی لال امیر عرف ابراہیم بھی شامل ہے۔
ترجمان کے مطابق ان کارروائیوں میں بھاری مقدار میں اسلحہ، گولہ بارود اور دھماکہ خیز مواد برآمد کیا گیا ہے ۔ترجمان نے بتایا کہ مارے گئے اور گرفتار خوارج مختلف دہشت گرد سرگرمیوں میں ملوث رہے ہیں،باقی ماندہ خوارج کے خاتمے کیلئے علاقے میں کلیئرنس آپریشن جاری ہے ۔ بیان میں کہا گیا ہے کہ پاک فوج دہشت گردی کے خاتمے کیلئے پرعزم ہے اور ملک کو ناسور سے مکمل نجات دلانے کیلئے اپنی جدوجہد جاری رکھے گی۔
