اسلام آباد: وزیراعظم شہباز شریف نے پی آئی اے کی نجکاری معینہ مدت میں یقینی بنانے ، روزڈ شوز اور سرمایہ کاروںکو مکمل اعتماد میں لینے کی ہدایت کرتے ہوئے کہا کہ اداروں کی نجکاری میں شفافیت یقینی بنانے کیلئے نجکاری عمل براہ راست ٹی وی ،ڈیجیٹل پلیٹ فارمز پر نشر کیا جائے۔
جمعہ کو جاری بیان کے مطابق وزیراعظم شہباز شریف کی زیر صدارت پی آئی اے کیلئے جائزہ اجلاس کا انعقاد ہوا جس میں وفاقی وزراء خواجہ محمد آصف، احد خان چیمہ، عطاء اللہ تارڑ، اٹارنی جنرل منصور اعوان، مشیران محمد علی، سید توقیر شاہ، وزیرِ مملکت بلال اظہر کیانی، معاون خصوصی ہارون اختر، نیشنل کوارڈنیٹر خصوصی سرمایہ کاری سہولت کونسل لیفٹیننٹ جنرل سرفراز احمد اور متعلقہ اعلی حکام نے شرکت کی۔اجلاس میں وزیراعظم کو نیلامی کے طریقہ کار، درکار مدت اور نیلامی میں شرکت کیلئے شرائط سے آگاہ کیا گیا۔ اجلاس کو آگاہ کیا گیا کہ انوسٹر آؤٹ ریچ کیلئے کنسلٹنٹ کے ساتھ مل کر ایک جامع سٹریٹجی بنائی گئی ہے ،اس پر مکمل عمل درآمد ہو رہا ہے۔
وزیراعظم نے پی آئی اے کی نجکاری مجوزہ معینہ مدت میں یقینی بنانے کی ہدایت کرتے ہوئے کہا کہ پی آئی اے نجکاری کیلئے روڈ شوز اور سرمایہ کاروں کو مکمل اعتماد میں لیا جائے۔ انہوں نے کہا کہ نجکاری کے طریقہ کار میں شفافیت کو مرکزی اہمیت دی جائے۔ وزیراعظم نے شفافیت یقینی بنانے کیلئے پی آئی اے سمیت تمام سرکاری کمپنیوں کی نجکاری براہ راست ٹیلی ویژن اور ڈیجیٹل پلیٹ فارمز پر نشر کرنے کی ہدایت کی۔
