اسلام آباد: امیر جماعت اسلامی حافظ نعیم الرحمن نے کہا ہے کہ پاکستان کو بھارت سے تجارت کا کوئی فائدہ نہیں، ہم عرصہ سے یہ کہہ رہے ہیں، ہر گزرتے دن کیساتھ یہ بات ثابت ہورہی ہے کہ کشمیر کا مسئلہ حل نہیں ہوگا، بھارت سے صورتحال بہتر نہیں ہوگی، ہفتہ کوبھارت و اسرائیل کے ہتھکنڈوں کے خلاف پورے ملک میں ہڑتال ہوگی، فوج اور قوم کوجنگ کے لیے تیار رہناہوگا کیونکہ یہ جنگ بھارت مسلط کر رہاہے۔
اسلام آباد میں میڈیا سے گفتگو کرتے ہوئے حافظ نعیم الرحمن نے کہا کہ بھارت کے خلاف پوری قوم کو اکٹھا ہونے کی ضرورت ہے، خلیج میں بھارت اسرائیل اور امریکا کاگٹھ جوڑ بدامنی کا منبع بنا ہوا ہے۔انہوں نے کہاکہ بھارت کا فالس فلیگ آپریشن کوئی نیا نہیں یہ اس سے پہلے کا طریقہ کار ہے ، 2000 میں چجی سنگھ پورا میں سکھوں کو قتل کیا گیا اور الزام پاکستان پر عائد کیا گیا، اس کے بعد مستند حوالوں سے بتایا گیا کہ یہ بھارت کا اپنا کیا کرایا تھا، اس وقت بل کلنٹن نے کہا تھا کہ شاید ہمارا دورہ نہ ہوتا تو سکھ نہ مارے جاتے۔
انہوں نے کہا اس وقت خلیج اور خطے کی صورتحال انتہائی تشویشناک ہوچکی ہے، بھارت کی جانب سے جو فالس فلیگ آپریشن کیا گیا اس کے بعد صورتحال زیادہ تشویش ناک ہے۔
