اسلام آباد: وزیر مملکت داخلہ طلال چودھری نے واضح کیا ہے کہ غیرقانونی مقیم غیر ملکیوں کے انخلاء کی تاریخ میں توسیع نہیں کی جائیگی، 30 اپریل کے بعد بغیرویزے کے غیر ملکی پاکستان نہیں رہ سکیں گے،امریکی ہتھیار دہشت گرد گروپوں کے ہاتھ لگنے کی خبریں ہمارے موقف کی تائید ہیں۔
اسلام آباد میں پریس کانفرنس کرتے ہوئے طلال چودھری نے کہا کہ پاکستان نے40سال تک افغان بھائیوں کی دل کھول کر میزبانی کی، دنیا میں کوئی ملک ایسا نہیں جہاں بغیر ویزے کے رہا جائے۔ انہوں نے کہا کہ غیرقانونی مقیم غیر ملکیوں کے انخلاء کی تاریخ میں توسیع نہیں کی جائیگی،30 اپریل کے بعد ویزے کے بغیر غیر ملکی پاکستان میں نہیں رہ سکیں گے۔
انہوں نے کہا غیر قانونی مقیم شہریوں کو پراپرٹی کرایہ پر دینے والوں کیخلاف بھی کارروائیاں کی جائیں گی۔انہوں نے بتایا کہ یکم اپریل سے اب تک 84ہزار 869افغان باشندے واپس بھیجے جا چکے ہیں،وزارتِ خارجہ افغان حکومت سے رابطے میں ہے۔
ایک سوال پر انہوں نے کہا کہ امریکی ہتھیار سے متعلق خبریں ہمارے موقف کی تائید ہیں،10لاکھ امریکی ہتھیاروں میں سے کچھ دہشت گرد گروپوں کے ہاتھ لگے ہیں جو یہاں دہشت گرد کارروائیوں میں استعمال ہو رہے ہیں۔
