اسلام آباد: وزیر اعظم شہباز شریف نے ملک کے اہم شہروں میں سیف سٹی منصوبوں کو جلد مکمل کرنے کی ہدایت کرتے ہوئے کہا ہے کہ دشمن ہماری معاشی کامیابیوں سے خائف ،دہشت گردوں کو ایسی عبرتناک شکست دیں گے وہ پاکستان کی طرف میلی آنکھ سے دیکھنے کی جرات نہیں کر سکیں گے، دہشت گردی ،انتہاپسندی کے مکمل خاتمے کیلئے تمام صوبوں کی استعداد کار بڑھانے کے لئے بھرپور تعاون کریں گے۔
جمعہ کو جاری بیان کے مطابق وزیراعظم کی زیر صدارت امن و امان صورتحال پر اجلاس کا انعقاد ہوا جس میں وزیر قانون اعظم نذیر تارڑ، وزیر داخلہ محسن نقوی ، وزیر اقتصادی امور احد خان چیمہ ، وزیر اطلاعات عطا تارڑ ، مشیر بین الصوبائی روابط رانا ثنااللہ ، وزیر مملکت داخلہ طلال چوہدری ، مشیر وزیر اعلی خیبر پختونخوا بیرسٹر سیف، وزیر داخلہ گلگت بلتستان شمس الحق لون، وزیر داخلہ آزاد کشمیر کرنل (ر)وقار نون، چاروں صوبوں ، گلگت بلتستان اور آزاد کشمیر کے چیف سیکرٹریز اور انسپکٹرز جنرل پولیس، چیف کمشنر اسلام آباد ، آئی جی اسلام آباد پولیس اور دیگر متعلقہ سرکاری اداروں کے افسران نے شرکت کی۔
اجلاس کو ملک میں امن و امان کے قیام کے حوالے اقدامات پر تفصیلی بریفنگ دی گئی جس میں بتایا گیا کہ نیکٹا میں نیشنل اینڈ پرونشل انٹیلی جنس فیوژن اینڈ تھریٹ اسیسمنٹ مرکز کا قیام عمل میں لایا جا چکا ہے۔اجلاس کو بتایا گیا کہ پنجاب کے 10شہروں میں سیف سٹی منصوبہ کام کر رہا ہے،کراچی، حیدرآباد، سکھر، لاڑکانہ، میر پور خاص اور نواب شاہ میں سیف سٹی منصوبے لگائے جا رہے ہیں،پشاور میں سیف سٹی منصوبہ منظور ہو چکاہے، اگلے مرحلے میں ڈیرہ اسماعیل خان ، بنوں، لکی مروت میں سیف سٹی منصوبے لگائے جائیں گے۔
بریفنگ میں بتایا گیا کہ گوادر سیف سٹی منصوبہ جلد مکمل کر لیا جائے گا جبکہ قومی شاہراہ این 25 اور قومی شاہراہ این 40 پر واقع تمام اہم شہروں میں سیف سٹی منصوبہ لگایا جائے گا۔اجلاس کو بتایا گیا کہ سمگلنگ روک تھام کے حوالے سے مختلف شاہراؤں اور پلوں پر ڈیجیٹل انفورسمنٹ اسٹیشنز کا قیام عمل میں لایا جا رہا ہے،ملک کے اہم شہروں کے گردونواح میں موجود تمام غیر قانونی تعمیرات کو ختم کرنے کے حوالے سے وفاقی اور صوبائی حکومتیں کاروائیاں کر رہی ہیں۔ بریفنگ میں بتایا گیا کہ ملک بھر میں بھکاریوں کیخلاف کریک ڈاؤن کیا جا رہا ہے ،ایسے عناصر کو بیرون ملک سفر سے روکنے کے حوالے سے بھی اقدامات اٹھائے جا رہے ہیں،اسلام آباد میں فارنزک سائنس ایجنسی قائم کی جاچکی ہے جبکہ پنجاب میں فارنزک سائنس ایجنسی کو مزید بہتر بنایا جا رہا ہے۔
اجلاس سے خطاب کرتے ہوئے وزیر اعظم نے کہا کہ ملک سے دہشت گردی کو جڑ سے اکھاڑنے کیلئے ہمارا جہاد جاری رہے گا، دہشت گردوں کو ایسی عبرتناک شکست دیں گے کہ وہ پاکستان کی طرف میلی آنکھ سے دیکھنے کی جرات نہیں کر سکیں گے،پاکستان کے دشمن ہماری معاشی کامیابیوں سے خائف ہیں۔
انہوں نے کہا کہ دہشت گردی کیخلاف بھرپور اقدامات اور کارروائیوں کے حوالے سے تمام اداروں اور صوبوں کی کوششیں لائق تحسین ہیں، دہشت گردی اور انتہاء پسندی کے مکمل خاتمے کیلئے وفاقی حکومت تمام صوبوں کی استعداد بڑھانے کیلئے بھرپور تعاون کریگی۔
وزیراعظم نے کہا کہ ہمیں آپس کے تمام اختلافات بھلا کر دہشت گردی کے خاتمے کیلئے مل کر کام کرنا ہے،ہماری سیکیورٹی فورسز کے بہادر جوان اور افسر دن رات دہشت گردوں سے نبرد آزما ہیں اور اپنی جانوں کا نذرانہ پیش کر رہے ہیں۔وزیراعظم نے ہدایت کی کہ سمگلنگ کیخلاف تمام ادارے اپنی کوششیں مزید تیز کریں، انسانی سمگلنگ کے نیٹ ورک کے گرد گھیرا مزید تنگ کیا جائے اور سمگلروں کو قانون کے شکنجے لایاجائے،ملک کے اہم شہروں میں سیف سٹی منصوبوں کو جلد از جلد مکمل کیا جائے۔ انہوں نے کہا کہ دہشت گردی کے خلاف بیانئے کے حوالے سے وفاق اور صوبے مل کر کام کر رہے ہیں جو خوش آئند ہے۔
