اسلام آباد: وزیراعظم شہباز شریف نے کہا ہے کہ ملکی معیشت مستحکم ہے، اجتماعی کاوشوں کی بدولت ترقی و خوشحالی کے سفر پر چل پڑے ہیں،تمام صوبوں کو ساتھ لیکر چلنا حکومت ،مسلح افواج کا وژن ہے،ٹیم پاکستان مشکلات کی طرح ترقی کا سفر بھی بھرپور اعتماد اور قوت ارادی کیساتھ طے کرے گی۔
جاری بیان کے مطابق جمعرات کو اسلام آباد میں جناح سکوائر مری روڈ انڈر پاس کے سنگ بنیاد رکھنے کی تقریب سے خطاب کرتے ہوئے وزیراعظم شہباز شریف نے کہا کہ اسلام آباد میں توسیع و تزین کے وسیع و عریض منصوبے جاری ہیں، ٹریفک کے بہاؤ میں بہتری آچکی ہے۔
انہوں نے کہا کہ محسن نقوی نے یہ منصوبہ 60کی بجائے 35دن میں مکمل کرنے کا اعلان کیا ہے، مجھے ان کی بات پر یقین ہے ماضی میں انہوں نے ایسے اعلانات کو عملی جامہ پہنایا ہے، یہ شہباز سپیڈ ہے اور نہ محسن نقوی بلکہ یہ پاکستان سپیڈ ہے،اسلام آباد جلد خوبصورتی کا گہوارہ بنے گا۔
انہوں نے کہا کہ اجتماعی کاوشوں سے معیشت میں استحکام آیا، پاکستان کا نام بلند ہوا، بہترین کاوشوں کے نتیجے میں پاکستان کی عالمی سطح پر درجہ بندی میں بہتری آئی۔ انہوں نے کہا کہ بلوچستان کا خونی ٹریک 2 ہزار کے قریب جانیں نگل چکا ہے، اسے ہائی وے بنانے جارہے ہیں یہ بلوچستان کی عوام کو تحفہ ہے،بلوچستان میں فاصلے زیادہ ہیں، بلوچستان کے عوام کو ایسا منصوبہ چاہئے تھا جو تمام اقوام کے دل کی آواز ہو۔
انہوں نے کہا کہ منصوبے کو اعلی معیار کے مطابق مکمل کریں گے، 2سال میں 300ارب سے زائد کے تخمینے سے شاہراہ تعمیر ہوگی۔ انہوں نے کہا کہ این ایف سی میں بلوچستان کا کوٹا ڈبل کر دیا ہے۔انہوں نے کہا کہ پاکستان کی تکمیل تمام اکائیوں سے ہوتی ہے، تمام صوبوں کو ساتھ لیکر چلنا حکومت اور مسلح افواج کا وژن ہے۔
انہوں نے کہا کہ ٹیم پاکستان مشکلات کی طرح ترقی کا سفر بھی بھرپور اعتماد اور قوت ارادی کیساتھ طے کرے گی۔
