راولپنڈی: آرمی چیف جنرل سید عاصم منیر نے کہا ہے کہ شہدا اور غازی ہمارا فخر ہیں، آج کا امن اور آزادی انہی کی لازوال قربانیوں کا نتیجہ ہے احترام ہر پاکستانی کیلئے مقدم ہے۔آئی ایس پی آر کے مطابق جی ایچ کیو راولپنڈی میں فوجی اعزازات دینے کی تقریب کا انعقا د ہوا جس میں آرمی چیف جنرل سید عاصم منیر نے پاک فوج کے افسران اور جوانوں کو اعزازات سے نوازا۔
بیان کے مطابق اعزازات آپریشنز میں غیر معمولی بہادری اور قوم کیلئے خدمات کے اعتراف میں دیئے گئے ہیں، تقریب میں اعلی فوجی حکام اور ایوارڈ حاصل کرنے والوں کے اہل خانہ کی بڑی تعداد نے شرکت کی۔تقریب میں ستارہ امتیاز (ملٹری)اور تمغہ بسالت کے اعزازات دیئے گئے، شہدا کے اہلخانہ نے بعد از مرگ دیئے جانے والے اعزازات وصول کئے۔
اس موقع پر آرمی چیف نے پاک فوج اور دہشت گردی کیخلاف جنگ میں قانون نافذ کرنے والے اداروں کی خدمات کو سراہتے ہوئے کہا ہے کہ شہدا اور غازی ہمارا فخر ہیں، شہدا کا احترام ہر پاکستانی کیلئے مقدم ہے۔ آرمی چیف نے کہا ہے کہ آج کا امن اور آزادی شہدا کی لازوال قربانیوں کا نتیجہ ہے، پاک فوج اور قانون نافذ کرنے والے اداروں کا بے لوث عزم قابل تعریف ہے۔
