اسلام آباد: پاکستان اور افغانستان کے مختلف علاقوں میں علی الصبح5.6 شدت زلزلے کے جھٹکے محسوس کئے گئے جس کے باعث لوگ خوف وہراس کا شکار ہو کر گھروں سے باہر نکل آئے۔ یورپین میڈیٹرینین سیسمولوجیکل سینٹر کے مطابق زلزلے کا مرکز بغلان افغانستان سے 167 کلو میٹر مشرق میں تھا جس کی گہرائی 121کلومیٹر ریکارڈ کی گئی۔
زلزلہ پیما مرکز کے مطابق زلزلے کے جھٹکے خیبر پختونخوا کے مختلف علاقوںمالاکنڈ، سوات، شانگلہ، چترال، ایبٹ آباد، مردان، مہمند، صوابی، لوئر دیر ،آزاد کشمیر کے علاقوں بھمبر سماہنی اور گردونواح اور پنجاب میں لاہور سمیت کئی شہروں میں محسوس کئے گئے، شہری خوفزدہ ہو کر گھروں سے باہر نکل آئے۔میڈیا رپورٹ کے مطابق زلزلے کے جھٹکے تاجکستان اور ازبکستان کے کئی علاقوں میں بھی محسوس کئے گئے۔
زلزلے کے باعث شہری خوف وہراس کا شکار ہو کر کلمہ طیبہ کا ورد کرتے گھروں سے باہر نکل آئے۔ پاکستانی زلزلہ پیما مرکز نے بتایا ہے کہ زلزلے کی شدت 5.3ریکارڈ کی گئی ہے جبکہ گہرائی 89 کلو میٹر تھی۔
