پشاور: پی ٹی آئی نے وفاقی حکومت پر تنقید کرتے ہوئے کہا ہے کہ ہمیں بارودی سرنگیں بچھانے کا طعنہ دینے والوں نے 3سالوں میںآئی ایم ایف کیساتھ4معاہدے کئے،گزشتہ 2سالوں میں ہر چیز کی قیمت بڑھی، زراعت میں منفی گروتھ سے ملک میں مہنگائی ہوئی، 50فیصد سے زائد آبادی غربت کی لکیر سے نیچے چلی گئی ہے۔
پشاور میں مشیر خزانہ مزمل اسلم کے ہمراہ پریس کانفرنس کرتے ہوئے شیخ وقا ص نے کہا کہ بلاول بھٹو نے الزام لگایا ہے کہ آئی ایم ایف کی بارودی سرنگیں پی ٹی آئی نے بچھائیں، ہم انتظار کر رہے ہیں پی ڈی ایم ون اور ٹو بتائے آپ نے کونسی ڈیل ختم کی؟۔
انہوں نے کہا کہ یہ کہتے ہیں کہ آئی ایم ایف نے کہا ہے کہ خسارہ بڑھ گیا ہے، خیبرپختونخوا میں الیکشن نہ کرائے جائیں،یہ کہتے ہیں یہ ہمارا آخری آئی ایم ایف پروگرام ہو گا،ہمیں طعنے دینے والوں نے آئی ایم ایف کیساتھ 3 سالوں میں 4 معاہدے کئے۔
اس موقع پر مشیر خزانہ خیبرپختونخوا مزمل اسلم نے کہا کہ جیب میں پیسے ہوں تو مہنگی چیز بھی سستی لگتی ہے، گزشتہ 2سالوں میں ہر چیز کی قیمت بڑھی، زراعت میں منفی گروتھ ہوئی جس وجہ سے ملک میں مہنگائی ہوئی۔
انہوں نے کہا کہ بانی پی ٹی آئی کے دور میں صنعت ڈبل ڈیجٹ میں گروتھ کررہی تھی، اس کے بعد ہر سال صنعت نے منفی گروتھ کی، 2025ء میں غربت بڑھ کر 40.5فیصد ہوگئی ہے۔انہوں نے کہا کہ پی ٹی آئی حکومت میں بیروزگاری 2.6 فیصد تھی وہ اب بڑھ کر6فیصد سے اوپر چلی گئی ہے، پاکستان کی 50فیصد سے زائد آبادی غربت کی لکیر سے نیچے چلی گئی ہے،جب یہ معیشت اچھی کرنے آئے لوگ اپنی گاڑیاں بیچنے پر آگئے۔
انہوں نے کہا کہ بیروزگاری کے باعث لوگ ملک چھوڑ کر جارہے ہیں، 2023ء میں 8لاکھ اور 2024ء میں 9لاکھ لوگ ملک چھوڑ کر گئے۔یہ کونسی معاشی ترقی ہورہی ہے؟ ۔
