اسلام آباد: وزیراعظم شہباز شریف نے برآمدات کے ذریعے ملکی آمدن میں اضافے کو اولین ترجیح قرار دیتے ہوئے آئندہ بجٹ کی تیاری میں صنعتوں ،کاروباری تنظیموں کی مشاورت وتجاویز کو شامل کرنے کی ہدایت کی ہے ۔جمعرات کو وزیراعظم شہباز شریف کی زیر صدارت برآمدات سہولت سکیم (ای ایف ایس)کے حوالے سے جائزہ اجلاس کا انعقاد ہوا جس میں وفاقی وزرا احسن اقبال، احد خان چیمہ، محمد اورنگزیب، علی پرویز ملک، سردار اویس خان لغاری، مشیر وزیر اعظم سید توقیر شاہ، کوآرڈنیٹر رانا احسان افضل، چیئرمین ایف بی آر راشد محمود لنگڑیال اور برآمدی صنعت سے تعلق رکھنے والی معروف شخصیات نے شرکت کی۔
اجلاس میں برآمدات سہولت سکیم کو موثر بنانے ،برآمدی شعبے کا اس سے استفادہ یقینی بنانے کیلئے قائم کمیٹی کی عبوری سفارشات پیش کی گئیں۔وزیراعظم نے کہا کہا کہ ملکی آمدن میں برآمدات کے ذریعے اضافہ حکومت کی اولین ترجیحات میں شامل ہے۔
انہوں نے ہدایت کی کہ برآمدی صنعتوں کے خام مال اور مشینری کی درآمد پر سہولت کیلئے سکیم کو مزید موثر بنانے بارے کمیٹی سفارشات پر شعبے کے ماہرین سے مزید مشاورت یقینی بنائی جائے۔وزیراعظم نے ہدایت کی کہ کمیٹی مزید مشاورت سے عبوری سفارشات کو حتمی شکل دے کر رپورٹ جلد پیش کرے۔
وزیراعظم نے کہا کہ مقامی صنعت کو لیول پلئینگ فیلڈ کی فراہمی یقینی بنانے کیلئے آئندہ بجٹ کی تیاری میں صنعتوں ،کاروباری تنظیموں سے مشاورت کر کے تجاویز کو بجٹ شامل کیا جائے ۔
