راولپنڈی: سیکیورٹی فورسز نے 6اور 7اپریل کی درمیانی شب ڈی آئی خان کے علاقے ٹکوارہ میں خفیہ اطلاعات پر کارروائی کے دوران فتنہ الخوارج کے 9دہشت گرد ہلاک کردیئے ۔آئی ایس پی آر کی جانب سے جاری بیان کے مطابق آپریشن کے دوران سیکیورٹی فورسز نے خوارج کے ٹھکانے کو موثر انداز میں نشانہ بنایا اور شدید فائرنگ کے تبادلے کے نتیجے میں 9خوارج ہلاک ہوگئے۔
ہلاک ہونے والوں میں ایک انتہائی مطلوب خارجی سرغنہ شیرین بھی شامل تھا جبکہ مارے گئے خوارج سے اسلحہ اور گولہ بارود بھی برآمد ہوا۔آئی ایس پی آر کے مطابق خارجی رنگ لیڈر شیرین قانون نافذ کرنے والے اداروں کو متعدد دہشت گرد کارروائیوں میں ملوث ہونے کی وجہ سے انتہائی مطلوب تھا اور کئی بے گناہ شہریوں کی ٹارگٹ کلنگ کیساتھ ساتھ 20مارچ 2025کو کیپٹن حسنین اختر شہید کی شہادت میں بھی ملوث تھا،آپریشن نے اس سنگین جرم کا بدلہ لے لیا ہے اور مرکزی مجرم اپنے انجام کو پہنچ چکا ہے۔
آئی ایس پی آر کے مطابق علاقے میں سرچ اور کلیئرنس آپریشن جاری ہے تاکہ کسی بھی بچے ہوئے خارجی کو انجام تک پہنچایا جا سکے۔ پاکستان کی سیکیورٹی فورسز ملک سے دہشت گردی کے مکمل خاتمے کیلئے پرعزم ہیں۔
