لاہور: وزیر اطلاعات پنجاب عظمی بخاری نے کہاہے کہ پنجاب کسی کا حق چھینتا ہے نہ کسی کو اپنا حق کھانے دیتا ہے،نہروں پر سیاست سندھ کا کام ہے، پیپلزپارٹی گھر کی لڑائی میڈیا پر لڑنے کی کوشش نہ کرے، مریم نواز سے سوال کی بجائے، صدر زرداری سے پوچھنا بہتر ہوگا۔
رہنماء پیپلز پارٹی چوہدری منظور کی پریس کانفرنس پر ردعمل دیتے ہوئے عظمی بخاری نے کہا کہ سندھ والے کہتے ہمارا پانی ہے، آپ کہتے یہ پنجاب کا پانی ہے، پیپلزپارٹی پہلے آپس میں طے کرلے یہ کس کا پانی ہے؟، آپ پنجاب میں رہ کر پنجاب کے خلاف لڑائی نہیں لڑ سکتے؟۔
انہوں نے کہا کہ نہروں پر سیاست کرنا ہمیشہ سندھ کا کام رہا ہے لیکن یہاں یہ نہیں ہوتا، کسانوں کے ساتھ کھڑے ہونے سے قبل دیکھ لیں کسان آپ کے ساتھ کھڑے ہیں یا نہیں، پنجاب نہ کسی کا حق چھینتا ہے نہ کسی کو اپنا حق کھانے دیتا ہے۔
انہوں نے کہا کہ پیپلزپارٹی گھر کی لڑائی میڈیا پر لڑنے کی کوشش نہ کرے،پنجاب نے ہمیشہ بڑے بھائی کا کردار ادا کیا ہے، وزیراعلی پنجاب سے سوال کی بجائے صدر پاکستان سے پوچھ لیں تو بہتر ہوگا۔
