پشاور: مشیر اطلاعات خیبرپختونخوا بیرسٹر سیف نے واضح کیا ہے کہ عمران خان نے کسی کو اسٹیبلشمنٹ سے مذاکرات شروع کرنے کا ٹاسک نہیں دیا ،بغیر تصدیق خبروں کی اشاعت سے گریز کیا جائے۔جاری بیان میں بیرسٹر سیف نے کہا کہ بانی پی ٹی آئی سے ملاقات میں حکومتی معاملات، دہشت گردی اور افغانستان کے امور پر تبادلہ خیال ہوا، عمران خان نے وزیراعلی کو حکومتی معاملات جبکہ مجھے دہشت گردی اور افغانستان کے مسئلے سے متعلق ہدایات دیں۔
انہوں نے کہا کہ عمران خان نے واضح طور پر کہا کہ وہ اپنی رہائی اور ذاتی فائدے کیلئے اسٹیبلشمنٹ سمیت کسی سے بات چیت نہیں کریں گے، عمران خان نے کہا کہ ملک کی معاشی ترقی اور سیاسی استحکام میرے لئے سب سے مقدم ہے۔
انہوں نے کہا کہ میڈیا ذرائع کے نام پر اسٹیبلشمنٹ سے مذاکرات شروع کرنے کی خبریں چلا رہا ہے مگر عمران خان نے اس بارے کسی کو بھی کوئی نیا ٹاسک نہیں دیا،میڈیا بغیر تصدیق کے ذرائع سے خبریں نشر کرنے سے گریز کرے۔
انہوں نے کہا کہ عمران خان نے کہا ہے کہ معاشی ترقی سیاسی استحکام کے بغیر ممکن نہیں اس لئے سیاسی استحکام کیلئے پی ٹی آئی کو تسلیم کرنا ہوگا ،دیوار سے لگانے کی کوشش بند کرنا ہوگی۔
