لندن: وزیر مملکت داخلہ طلال چودھری نے کہا ہے کہ نواز شریف خاموشی سے اپنا کردار ادا کررہے ہیں، آرمی چیف کے دورہ برطانیہ کے مثبت نتائج سامنے آرہے ہیں ، یورپ کو غیر قانونی تارکین وطن کی آمد روکنے بارے مکمل تعاون کی یقین دہانی کرائی ہے۔
لندن میں نجی ٹی وی سے گفتگو کرتے ہوئے طلال چودھری نے کہا کہ برطانیہ میں غیرقانونی پاکستانیوں کا مسئلہ نہ ہونے کے برابر ہے،ہم نے یورپ کو غیر قانونی تارکین وطن کی آمد روکنے کے حوالے سے مکمل تعاون کی یقین دہانی کرائی ہے۔
انہوں نے کہا کہ پاکستان نے انسانی سمگلنگ میں ملوث 218 افراد کو پکڑا ہے، برطانیہ نے پاکستان کے غیرقانونی تارکین وطن کے حوالے سے کام کو سراہا ہے۔ انہوں نے کہا کہ یورپ کے متعدد ممالک کو افغان شہریوں کو لے جانے کا وعدہ بھی یاد دلایا ہے ۔ انہوں نے کہا کہ آرمی چیف کے دورہ برطانیہ کے مثبت نتائج سامنے آرہے ہیں، نواز شریف خاموشی سے اپنا کردار ادا کررہے ہیں۔
