نیو یارک: وزیراعظم کے معاون خصوصی خارجہ امور طارق فاطمی نے کہا ہے کہ ہم نے بھی امریکا کو واضح کردیا دہشتگردی ہر گز برداشت نہیں کرینگے،دورہ امریکہ میں ٹرمپ انتظامیہ سے جامع ملاقاتیں ہوئی ہیں،آئندہ 3سے 6ماہ کے دوران پاکستان میں بڑی سرمایہ کاری آنے کا امکان ہے۔
نجی ٹی وی سے گفتگو کرتے ہوئے طارق فاطمی نے بتایا کہ دورہ امریکہ میں ٹرمپ انتظامیہ کیساتھ ملاقاتیں جامع اور دوستانہ رہیں، خطے میں مشکل حالات میں پاک امریکا تعاون بامعنی رہا۔انہوں نے کہا کہ نئی انتظامیہ کے آنے جانے سے ممالک کے بنیادی معاملات تبدیل نہیں ہوتے، وزیراعظم چاہتے ہیں کہ ہمسایہ ممالک کے ساتھ بہترین معاشی تعاون ہو، آئندہ 3سے 6ماہ کے دوران پاکستان میں بڑی سرمایہ کاری آنے کا امکان ہے۔
انہوں نے کہا کہ دہشت گردی کے خلاف امریکی صدر کے اہم بیانات سامنے آچکے ہیں، ہم نے بھی امریکہ کو واضح کردیا کہ دہشت گردی ہرگز برداشت نہیں کریں گے۔
انہوں نے کہا کہ حال ہی میں پاکستان نے امریکا کو مطلوب اہم دہشت گرد پکڑ کر دیا، دہشت گرد امریکا کے حوالے کرنے کے پاکستانی اقدام کو امریکی صدر نے سراہا، دہشت گردی کے خلاف پاکستانی عوام اور قانون نافذ کرنے والے اداروں نے بڑی قربانیاں دی ہیں۔
