پشاور: سیکرٹری جنرل پی ٹی آئی شیخ وقاص اکرم نے کہا ہے کہ حکومت کا ساتھ دینے والوں نے ہاتھ اٹھا لئے تو کل حکمرانوں کو بھی مشکلات ہونگی، ایک شخص سے اتنا خوف کبھی نہیں دیکھا،خیبرپختونخوا کے علاوہ ملک ہمارے لئے کنٹینرستان بن گیاہے، اٹک پل پار نہیں جاسکتے، اگر عدالت معمولی افسر سے فیصلے پر عمل درآمد نہیں کر سکتی تو پھر اسے بند کیا جانا چاہئے یا ایسے افسران کو عبرت کا نشان بنانا چاہئے۔
پشاور میں پریس کانفرنس کرتے ہوئے شیخ وقاص اکرم نے کہا کہ ہمارے بہت سے ساتھی 2سال سے جیلوں میں ہیں، ہمارا مینڈیٹ چوری کیا گیا اور اب ہمیں سیاسی سرگرمیوں کی بھی اجازت نہیں، ہمارے ساتھیوں کے کاروبار تک بند کردیئے گئے ہیں۔
انہوںنے کہا کہ عمران خان کی گرفتاری پر عوام نے احتجاج کیا ، سابق چیف جسٹس نے ہم نے نشان تک چھین لیا، خیبرپختونخوا میں سینیٹ انتخابات پر ابھی تک کوئی پیش رفت نہیں ہو رہی۔ انہوں نے کہا کہ کیا وجہ ہے کہ ابھی تک الیکشن نہیں ہو رہے، اس پر قوم آپ کو کبھی معاف نہیں کرے گی۔ انہوں نے کہا کہ عدالتی احکامات پر اڈیالہ جیل حکام عملدرآمد نہیں کررہے، عمران خان کے مقدمات عدالتوں میں نہیں لگ رہے، اس صوبے کے علاوہ باقی پاکستان ہمارے لیے کنٹینرستان بن گیا ہے، ہم اٹک پل کے اس پار نہیں جا سکتے۔
انہوں نے کہا کہ پیکا آرڈیننس کے بعد نہ صرف ہمارے لئے بلکہ میڈیا کے لئے بھی مسائل کا سامنا ہے، ہمارے لوگوں کو اٹھایا جا رہا ہے، طاقت کا استعمال کیا جا رہا ہے، ابھی تک ہمارے سوشل میڈیا کے گرفتار کارکنوں کو عدالتوں میں پیش نہیں کیا گیا، ایسے اقدامات سے نفرتیں بڑھیں گی۔
انہوں نے کہا کہ یہ پھر کہتے ہیں کیوں نفرت کی جارہی ہے۔ انہوں نے کہا کہ عید کے بعد توہین عدالت کی درخواست دائر کرینگے۔ انہوں نے کہا کہ قوم سوال کررہی کہ اگر عدالت ایک معمولی افسر سے عدالتی فیصلے پر عمل درآمد نہیں کر سکتی تو پھر اسے بند کیا جانا چاہئے یا ایسے افسران کو عبرت کا نشان بنانا چاہئے۔
انہوںنے کہا کہ امید ہے اب عمران کی بچوں سے بات کروا دی جائے گی اور کتابیں بھی فراہم کی جائینگی۔انہوں نے کہا کہ ایک شخص سے اتنا خوف کبھی نہیں دیکھا، نومبر کے بعد 5 ہزار کارکنان ہمارے گرفتار ہوئے ہیں، اگر ساتھ دینے والوں نے حکومت سے ہاتھ اٹھا لئے تو کل انہیں بھی مشکلات ہونگی، ہاتھ ہٹتے زیادہ دیر نہیں لگتی، پتہ بھی نہیں چلتا ہاتھ کب اٹھ گیا؟۔
