اسلام آباد: وزیراعظم شہبازشریف نے کہا ہے کہ نوجوانوں کو آئی ٹی شعبے میں فنی تربیت کی فراہمی اولین ترجیح ہے ، ہواوے کے آئی سی ٹی تربیتی پروگرام سے آئی ٹی برآمدات میں اضافہ ،نوجوانوں کو روزگار مواقع کے حصول میں بھی مدد ملے گی ۔جاری بیان کے مطابق جمعرات کو وزیراعظم سے ہواوے کے چیف ایگزیکٹو آفیسر ایتھن سن کی زیر قیادت 5رکنی وفد نے ملاقات کی ، اس موقع پر وفاقی وزیر اقتصادی امور احد خان چیمہ ، وزیر اطلاعات عطا تارڑ ، وفاقی آئی ٹی شزہ فاطمہ خواجہ، چیئرمین ہائیر ایجوکیشن کمیشن ڈاکٹر مختار احمد و متعلقہ اعلی سرکاری افسران موجود تھے۔
وزیراعظم کو ہواوے کے زیر اہتمام تین لاکھ پاکستانی نوجوانوں کو آئی ٹی کے شعبے میں تربیت کی فراہمی بارے پیشرفت پر بریفنگ دیتے ہوئے بتایاگیا کہ تین لاکھ نوجوانوں میں سے 2لاکھ 40ہزار نوجوانوں کو بنیادی نوعیت جبکہ 60ہزار نوجوانوں کو ہائی ٹیک تربیت فراہم کی جائے گی۔
وزیراعظم کو آگاہ کیا گیا کہ رواں سال کے اختتام تک تمام 3لاکھ نوجوانوں کی تربیت مکمل ہو گی ، تربیتی پروگرامز کی تھرڈ پارٹی ویلیڈیشن کروائی جائے گی ۔وزیراعظم کو بتایا گیا کہ ہواوے ، ہائر ایجوکیشن کمیشن کے اشتراک سے 15پاکستانی یونیورسٹیوں میں مصنوعی ذہانت، کلاڈ کمپیوٹنگ، بگ ڈیٹا اور سائبر سکیورٹی کے کورسز متعارف کروائے گئے ہیں۔
اس موقع پر وزیراعظم شہباز شریف نے کہاکہ پاکستانی نوجوانوں کو انفارمیشن ٹیکنالوجی کے شعبے میں فنی تربیت کی فراہمی حکومت کی اولین ترجیح ہے ، ہواوے کیساتھ ٹھوس اور طویل مدتی شراکت چاہتے ہیں ۔ انہوں نے کہاکہ ہواوے کے آئی سی ٹی تربیتی پروگرام سے نہ صرف آئی ٹی برآمدات میں اضافہ ہوگا بلکہ نوجوانوں کو روزگار کے مواقع حاصل کرنے میں بھی مدد ملے گی ۔
