اسلام آباد: آرمی چیف جنرل سید عاصم منیر کی والدہ ماجدہ رضائے الٰہی سے وفات پا گئیں،انا للہ وانا الیہ راجعون۔مرحومہ کی وفات پر صدر آصف زرداری، وزیر اعظم شہباز شریف اور دیگر اعلی حکومتی شخصیات نے آرمی چیف سے اظہار افسوس کیا ہے۔
صدر زرداری نے اپنے تعزیتی پیغام میں مرحومہ کی وفات پر اظہار افسوس کرتے ہوئے کہا کہ غم کی گھڑی میں برابر کا شریک ہوں۔ انہوں نے مرحومہ کیلئے بلند درجات اور سوگوار خاندان کیلئے صبر جمیل کی دعاء کی۔وزیراعظم شہباز شریف نے جنرل سید عاصم منیر کی والدہ کے انتقال پر دکھ اور افسوس کا اظہار کرتے ہوئے کہا کہ سوگوار خاندان کے دکھ میں برابر کے شریک ہیں ، اللہ مرحومہ کے درجات بلند کرے۔
چیئرمین سینیٹ یوسف رضا گیلانی و سپیکر قومی اسمبلی سردار ایاز صادق نے آرمی چیف اور اہلخانہ سے تعزیت و ہمدردی کا اظہار کرتے ہوئے کہا کہ والدین قدرت کا انمول تحفہ ہیں، ان کا بچھڑنا ایک ناقابل تلافی نقصان اور بڑا صدمہ ہے۔
انہوں نے کہا کہ غم اور دکھ کی گھڑی میں سید عاصم منیر اور اہلخانہ کیساتھ ہیں۔ اللہ تعالی مرحومہ کے درجات بلند فرمائے اور اہل خانہ کو صبر جمیل عطا کرے۔ وزیر داخلہ محسن نقوی ،وفاقی وزیر امور کشمیر انجینئر امیر مقام ،سربراہ جے یو آئی مولانا فضل الرحمن نے بھی آرمی چیف جنرل سید عاصم منیر اور خاندان کیساتھ دلی ہمدردی کا اظہار کیا اور مرحومہ کی درجات کی بلندی کی دعاء کرتے ہوئے کہا کہ والدہ کی وفات ایک ناقابل تلافی نقصان ہے، اللہ تعالی مرحومہ کو جنت الفردوس میں اعلی مقام عطا کرے۔
قائد جمعیت نے کہا کہ ماں جیسی شفیق اور پیار کرنے والی ذات کی رحلت یقینا بڑا صدمہ ہے، ماں کا کوئی نعم البدل نہیں، اللہ تعالی جنرل عاصم منیر کی فیملی کو صبر جمیل عطا فرمائے۔
وزیر اعلی مریم نواز شریف اور گورنر سندھ کامران ٹیسوری نے بھی آرمی چیف سے گہرے دکھ کا اظہار کرتے ہوئے کہا کہ اللہ تعالی مرحومہ کو جنت الفردوس میں اعلی مقام عطا فرمائے اور لواحقین کو صبر جمیل دے۔
