اسلام آباد: وفاقی کابینہ کا اجلاس کل بروز بدھ کو طلب کرلیا گیا۔ ذرائع کے مطابق منگل کو طلب کیا گیا وفاقی کابینہ کا اجلاس وزیراعظم کی مصروفیات کے باعث ملتوی کردیا گیا ہے ، اجلاس میں ملکی سیاسی و معاشی صورتحال سمیت 12 نکاتی ایجنڈے پر غور کیا جانا تھا۔
بدھ کو ہونیوالے اجلاس میں پاکستان آرڈیننس فیکٹری اور ہیوی انڈسٹریز ٹیکسلا بورڈ ممبران کی تقرری اور بین الاقوامی تنازعات کے حل کیلئے کنونشن پر دستخط کی منظوری دی جائے گی۔اجلاس میں سفارتی مشن کے ارکان کے لیے تجارتی سرگرمیوں کے لئے وزارت خارجہ پاکستان اور ہنگری کی وزارت خارجہ و تجارت کے درمیان معاہدے پر دستخط ،وزارت صنعت و پیداوار اور بین الاقوامی مالیاتی کارپوریشن کے درمیان ای-موبلٹی پر تعاون کے معاہدے پر دستخط کرنے کی منظوری دی جائے گی۔
ایجنڈے میں اسلام آباد ہائی کورٹ کی ہدایات سے متعلق وزارت داخلہ کی سمری بھی شامل کی گئی ہے۔کابینہ وسل بلور پروٹیکشن اینڈ ویجیلنس کمیشن ایکٹ 2025ء پر غور کرے گی جبکہ چیئرمین پاکستان ٹوبیکو بورڈ کا اضافی چارج سونپنے سے متعلق وفاقی کابینہ فیصلہ دے گی۔
اجلاس میں 11مارچ کو ہونے والے کابینہ کمیٹی برائے نجکاری کے فیصلے کی توثیق لی جائے گی۔کابینہ کی اقتصادی رابطہ کمیٹی کی جانب سے 13اور 21مارچ کو ہونے والے اجلاس کے فیصلوں کی توثیق بھی ایجنڈے میں شامل ہے۔
وسائل کی نقل و حمل اور استعمال میں بہتری کے پروگرام پالیسی، پروگرام ٹو کی تکمیل پر وفاقی کابینہ غور کرے گی۔انکم ٹیکس ترمیمی بل 2025ء کے ذریعے کل وقتی اساتذہ اور محققین کی آمدنی پر ٹیکس چھوٹ کی بحالی کی منظوری ایجنڈے میں شامل ہے۔
