پشاور: مشیر اطلاعات خیبر پختونخوا بیرسٹر سیف نے چینی قیمتوں میں اضافے پر تنقید کرتے ہوئے کہاہے کہ چینی قیمت اور وزراء کی تنخواہیں شہباز اسپیڈ سے بڑھ رہی ہیں،حکمران شوگر مافیا نے ناجائز منافع سے اپنی عید میٹھی اور مہنگائی کے مارے عوام کی عید پھیکی کر دی ہے۔
جاری بیان میں بیرسٹر سیف نے کہا کہ چینی کی قیمتوں میں اضافے کی وجہ چینی کارخانوں اور حکومت کے مالک کا ایک ہونا ہے۔ انہوں نے کہا کہ خام چینی درآمد کرنے کا شہباز شریف حکومت کا فیصلہ حکمران چینی مافیا کو ایک اور ناجائز فائدہ پہچانے کی مجرمانہ کوشش ہے۔
انہوں نے کہا کہ حکمران شوگر مافیا نے ناجائز منافع سے اپنی عید میٹھی اور مہنگائی کے مارے عوام کی عید پھیکی کر دی ہے، عرفان صدیقی سے اپیل کرتا ہوں کہ شہباز شریف سے کہیں تنخواہ لے لیں لیکن چینی کی قیمت کم کرا دیں۔
انہوں نے کہا کہ چوری چوری سرکولیشن سمری کے ذریعے وزرا کی تنخواہوں میں 188فیصد اضافے کی منظوری سے 20مارچ کے وفاقی کابینہ کے رضاکارانہ کام کرنے کا اعلان جھوٹ ثابت ہو چکا ہے۔ انہوں نے کہا کہ چینی کی قیمت اور حکومت کے وزرا کی تنخواہیں شہباز اسپیڈ سے بڑھ رہی ہیں۔
