اسلام آباد: رکن قومی اسمبلی شیر افضل مروت نے کہا ہے کہ فتنہ پھیلانے والے لوگ عمران خان سے ملاقات میں رکاوٹ ہیں،26 نومبر کو گاڑیاں بھی ہماری چھینی گئی، مقدمات بھی ہم پر بنائے گئے،کسی جماعت سے رابطہ نہیں کوئی ملے تو سلام دعاء کرلیتاہوں۔
جوڈیشل کمپلیکس اسلام آباد میں میڈیا سے گفتگو ہوئے شیر افضل مروت نے کہا کہ پی ٹی آئی کی پوری قیادت مقدمات میں نامزد ہے، کسی دن پی ٹی آئی کا کوئی ایک رہنماء عدالت ہوتا ہے، کسی دن دوسرا رہنماء ۔ انہوں نے کہا کہ 26نومبر کو گاڑیاں بھی ہماری چھینیں اور مقدمات بھی ہم پر بنائے گئے، بانی پی ٹی آئی 26نومبر کی معافی کیوں مانگیں؟۔
انہوں نے کہا کہ حکومت ہوشیار ہوتی تو بلوچستان میں امن آ جاتا۔ایک سوال پر انہوں نے کہا کہ فتنہ پھیلانے والے کئی لوگ ہیں جو عمران خان سے میری ملاقات میں رکاوٹ ڈالتے ہیں جب بانی پی ٹی آئی بلائینگے ملنے چلا جاؤں گا۔ انہوں نے کہا کہ میرا کسی جماعت سے کوئی رابطہ نہیں، کوئی ملے تو سلام دعا کر لیتا ہوں۔
