اسلام آباد: پاکستان نے ٹیکنالوجی میدان میں ایک اورسنگ میل عبور کرتے ہوئے اپنا مصنوعی ذہانت کا نظام متعارف کروا دیا۔ اسلام آباد میں منعقدہ تقریب میں ‘ذہانت اے آئی ‘ منصوبے کی بانی و آئی ٹی ماہر مہوش سلیمان علی نے نظام لانچ کرتے ہوئے شرکاء کو تفصیلات سے آگاہ کیا۔
اس موقع پر آئی ٹی ماہرین، ٹیکنالوجی شعبے سے وابستہ افراد اور مختلف شعبہ ہائے زندگی کے نمائندوں نے شرکت کی۔ مہوش سلیمان نے بتایا کہ یہ منصوبہ کئی مراحل سے گزرنے کے بعد کامیابی سے ہمکنار ہوا ہے۔ انہوں نے بتایا کہ ڈیٹا سینٹرز میں کی گئی محنت اور تحقیق کے بعد یہ خواب حقیقت بن پایا ہے۔
انہوں نے کہا کہ یہ کامیابی صرف میری ذاتی کوششوں کا نتیجہ نہیں بلکہ یہ پورے پاکستان کی کامیابی ہے۔انہوںنے بتایا کہ ذہانت اے آئی ایک جدید چیٹ بوٹ ہے جو صارفین کو مختلف زبانوں میں خدمات فراہم کرے گا، یہ نظام پاکستانی صارفین کو مقامی ڈیٹا سرورز کے ذریعے استعمال کرنے کی سہولت دے گا، جس سے ڈیٹا کی حفاظت اور تیز رفتار خدمات کو یقینی بنایا جائے گا۔
مہوش سلیمان نے زور دیا کہ ذہانت اے آئی کو عالمی معیار کے مطابق تیار کیا گیا ہے، اور یہ پاکستان کو ٹیکنالوجی کے میدان میں ایک نئی پہچان دلائے گا۔تقریب میں شریک ماہرین اور شرکا نے ذہانت اے آئی کو پاکستان کیلئے بڑی کامیابی قرار دیتے ہوئے کہا کہ یہ منصوبہ نہ صرف پاکستان کی ٹیکنالوجی کی صلاحیتوں کو اجاگر کرتا ہے، بلکہ یہ ملک کو عالمی سطح پر بھی ایک مضبوط مقام دلانے میں مددگار ثابت ہوگا۔
مہوش سلیمان نے بتایا کہ ذہانت اے آئی کو مزید بہتر بنانے کیلئے کام جاری ہے،آئندہ دنوں میںپاکستانی صارفین کی ضروریات بہترین طریقے سے پوری کرنے کیلئے نظام کو مزید زبانوں و خصوصیات کیساتھ اپ گریڈ کیا جائے گا ۔
