لندن: برقی سب اسٹیشن میں خوفناک آتشزدگی کے باعث لندن میں واقع دنیا کے مصروف ترین ہیتھرو ایئرپورٹ کو ایک دن کیلئے لیے مکمل بند کر دیا گیا، ایئرپورٹ کی بندش سے 1300 فلائٹس متاثر ہوئیں۔غیر ملکی میڈیا کے مطابق ہیتھرو ایئرپورٹ کی جانب سے جاری بیان میں کہا گیا ہے کہ ایئرپورٹ سے ملحقہ سب اسٹیشن میں آگ لگنے کی وجہ سے ہیتھرو ایئرپورٹ کو بجلی کی شدید بندش کا سامنا ہے، مسافروں اور ملازمین کی حفاظت کو برقرار رکھنے کے لیے ہیتھرو کوجمعہ کو 23 بجکر 59 منٹ تک بند رکھا گیا۔
لندن فائر بریگیڈ نے ایک بیان میں کہا ہے کہ مغربی لندن کے علاقے ہیز میں ایک برقی سب اسٹیشن کے اندر ایک ٹرانسفارمر میں آگ لگ گئی تھی، بیان میں کہا گیا ہے کہ آگ بجھانے کی 10 فائر ٹینڈرز اور تقریبا 70 فائر فائٹرز آگ بجھانے میں مصروف رہے۔
اسسٹنٹ کمشنر پیٹ گولبورن نے ایک بیان میں کہا کہ تقریبا 150 افراد کو محفوظ مقامات پر منتقل کیا گیا اور حکام نے احتیاط کے طور پر 200 میٹر کا محاصرہ قائم کیا۔
ایئرپورٹ کی جانب سے جاری بیان میں کہا گیا ہے کہ مسافروں کو مشورہ دیا جاتا ہے کہ وہ ہیتھرو کا سفر نہ کریں اور مزید معلومات کے لیے اپنی ایئرلائن سے رابطہ کریں۔ٹریکنگ ویب سائٹ فلائٹ ریڈار 24 کے مطابق ہیتھرو ایئرپورٹ کے قریب آگ لگنے کی وجہ سے 1300 سے زائد پروازیں متاثر ہوئیں جس سے ہزاروں مسافروں کو مشکلات کا سامنا کرنا پڑا۔
