لاہور: وزیر اطلاعات پنجاب عظمی بخاری نے کہا ہے کہ مریم نواز کی کارکردگی بول رہی ، تمام صوبوں کے عوام گواہی دے رہے ہیں، منصوبوں کو بزدار سے جوڑا جارہا وہ اتنے قابل ہوتے تو اپنا تعارف خود کرا لیتے، کچھ سیاسی بونوں کو سمجھ نہیں، نمبر بنانے کیلئے کچھ نہ کچھ کرنا پڑتا ہے،اپوزیشن لیڈر نے جھوٹ پر سارا وائٹ پیپر چھاپا، مشورہ ہے انہیں جس نے چیزیں بھیجیں اسے بلاک کر دیں۔
لاہور میں پریس کانفرنس کرتے ہوئے عظمی بخاری نے کہا کہ تمام صوبوں کے عوام وزیراعلی مریم نواز کی کارکردگی کی گواہی دے رہے ہیں،سروے رپورٹ میں 70فیصد لوگ وزیراعلی مریم نواز کی کارکردگی سے متاثر ہیں، مریم نواز کسانوں کو سہولیات دے رہی ہیں،وزیراعلی کے کسان کارڈ پر اب تک 54ارب روپے کی خریداری ہو گئی ہے، پنجاب حکومت اب تک 10ہزار گرین ٹریکٹرز ،30ہزار بچوں کو سکالر شپس دے چکی ہے۔
انہوں نے کہا کہ مریم نواز تمام بڑی بیماریوں کی ادویات مریضوں کے گھروں تک پہنچاتی ہیں، ڈائیلاسز پروگرام کے تحت 10لاکھ تک کا کارڈ لوگوں کو مل رہا ہے،مریضوں کیلئے 10 ماہ میں ایئر ایمبولینس سروس بھی شروع کی گئی۔
انہوں نے کہا کہ پنجاب میں لائیوسٹاک کارڈ کی سہولت لائے ہیں جس کے تحت جو مویشی یہاں پالے جائیں گے ان کو باہر بھیج کر زرمبادلہ کمایا جائے گا، مریم نواز نے اپنی چھت اپنا گھر پروگرام جیسا فلیگ شپ منصوبہ شروع کیاجس کے تحت ہزاروں گھر بن چکے ہیں۔
انہوں نے کہا کہ آج مریم نواز کے سارے منصوبوں سے بزدار کو جوڑا جا رہا ہے، عثمان بزدار اتنے قابل ہوتے تو اپنا تعارف خود ہی کرا لیتے، روڈا کا منصوبہ پی ٹی آئی حکومت نے تباہ وبرباد کیا، منصوبے پر تمام صحافیوں کو ٹرک کی بتی کے پیچھے لگایا گیا۔
انہوں نے کہا کہ پی ٹی آئی دور میں کینسر کے مریضوں تک کی ادویات بند کر دی گئی تھیں، انہوں نے یہ بھی جھوٹ بولا کہ ایئرایمبولینس لانی ہے، یہ کہتے تھے الیکٹرک بسیں لائیں گے۔
انہوںنے کہا کہ کچھ سیاسی بونوں اور سیاسی یتیموں کو سمجھ نہیں آتی، پنجاب اسمبلی کے اپوزیشن لیڈر کو نمبر بنانے کیلئے کچھ نہ کچھ کرنا پڑتا ہے، یہ اپنے لوگوں کا خود سامنا نہیں کر سکتے، موصوف نے جھوٹ پر سارا وائٹ پیپر چھاپ دیا، اپوزیشن لیڈر کو مفید مشورہ ہے جس نے آپ کو یہ چیزیں بھیجیں اس کو بلاک کر دیں۔
