اسلام آباد/جدہ: پاکستان اور سعودی عرب نے بڑھتے اقتصادی تعاون پر اطمینان کا اظہار کرتے ہوئے خطے میں امن، استحکام و خوشحالی کیلئے مشترکہ وژن کے فروغ کیلئے ہر سطح پر مل کر کام کرنے پر اتفاق کیا ہے۔
جمعرات کو جاری بیان کے مطابق وزیر اعظم شہباز شریف نے سعودی عرب کے ولی عہد اور وزیر اعظم شہزادہ محمد بن سلمان سے ملاقات کی، اس موقع پر نائب وزیر اعظم و وزیر خارجہ اسحاق ڈار، آرمی چیف جنرل سید عاصم منیر اور وزیر اعلی پنجاب مریم نواز بھی موجود تھے۔
ملاقات میں پاکستان اور سعودی عرب کے درمیان مضبوط اور تاریخی تعلقات کی اہمیت پر زور دیا گیا اور اقتصادی، تجارتی، سرمایہ کاری، توانائی اور دفاعی شعبوں میں تعاون بڑھانے پر بات چیت کی گئی۔دونوں رہنماؤں نے پاکستان اور سعودی عرب کے درمیان بڑھتے اقتصادی تعاون پر اطمینان کا اظہار کیا۔
وزیراعظم نے اہم شعبوں میں سرمایہ کاری بڑھانے کیلئے سعودی عرب کے عزم کو سراہا جو پاکستان کی اقتصادی ترقی اور استحکام میں معاون ثابت ہوگا۔ فریقین نے علاقائی سلامتی کے مسائل سے نمٹنے کیلئے مشترکہ کوششوں کی اہمیت تسلیم کرتے ہوئے دفاعی اور سیکیورٹی تعاون کو مضبوط بنانے کے اپنے عزم کا اعادہ کیا۔
دونوں رہنماؤں نے ابھرتی علاقائی صورتحال کیساتھ خطے کے سیاسی منظر نامے پر بھی تبادلہ خیال کیا اور خطے میں امن، استحکام اور خوشحالی کیلئے اپنے مشترکہ وژن کو فروغ دینے کیلئے ہر سطح پر مل کر کام کرنے پر اتفاق کیا۔ شہزادہ محمد بن سلمان نے سعودی عرب میں پاکستانی کمیونٹی کی نمایاں خدمات کا اعتراف کرتے ہوئے ان کی فلاح وبہبود کیلئے اقدامات بڑھانے پر اتفاق کیا۔
دونوں رہنماؤں نے عوام کے درمیان روابط، ثقافتی تبادلے ،تعلیمی تعاون کو مزید مضبوط بنانے کی ضرورت پر زور دیا اور باہمی احترام، مشترکہ مفادات اور ترقی و خوشحالی کے مشترکہ وژن کی رہنمائی میں پاکستان اور سعودی عرب کی شراکت داری کو نئی بلندیوں تک پہنچانے کے عزم کا اعادہ کیا۔
