لاہور: وزیر اطلاعات پنجاب عظمی بخاری نے کہا ہے کہ مریم نوازنے اپنے کاموں سے عوام کے دل میں جگہ بنائی، پنجاب حکومت کی کارکردگی کچھ لوگوں کو ہضم نہیں ہو رہی،سوشل میڈیا پر پی ٹی آئی بے بنیاد پراپیگنڈے میں مصروف ، ان کے منصوبوں کا کوئی ریکارڈ موجود نہیں۔لاہور میں پریس کانفرنس کرتے ہوئے عظمی بخاری نے کہا کہ پنجاب حکومت کو ایک سال مکمل ہوچکا، حکومت کا ایک بھی منصوبہ ادھورا نہیں ہے، کوئی منصوبہ ایسا نہیں کہ کہا جارہا ہو شروع کریں گے۔
انہوں نے کہا کہ ہر منصوبے کا بتانے کیلئے دروازے پر دستک نہیں دی جاتی تاہم ایک جماعت کو پنجاب حکومت کی کارکردگی سے بہت مسئلہ ہورہا ہے۔ انہوں نے کہا کہ پی ٹی آئی والے اپنے دور حکومت میں مریم نواز کو والد کے سامنے گرفتار کرنے میں مصروف تھے، ان کے دور میں ہرعہدے کا ایک ریٹ مقرر تھا،پیسے لیکر تقررو تبادلے کئے جاتے تھے، ان کے منصوبوں کا کوئی ریکارڈ نہیں، یہ صرف سوشل میڈیا پر تھے، بانی نے خود کہا تھا کہ عثمان بزدار اپنی کارکردگی اشتہارات کے ذریعے بتائیں۔
انہوں نے کہا کہ پی ٹی آئی اشتہار پر کوئی بڑا منصوبہ نظر نہیں آئے گا۔ انہوں نے کہا کہ پی ٹی آئی پنجاب حکومت کیخلاف پراپیگنڈا کررہی ہے دو روز سے ایک مہم شروع ہے یہ کہہ رہے ہیں منصوبے پی ٹی آئی کے اورتختی مریم نواز کی، ڈائیلسز کا پروگرام بزدار کا نہیں شہبازشریف نے شروع کیا تھا، مریم نواز نے ڈائیلسز کارڈ کیلئے 10لاکھ روپے مختص کردیئے ہیں۔
انہوں نے کہا کہ ایئرایمبولینس کے نعرے بھی بہت بار لگے مگر مریم نواز کی حکومت 6 ماہ میں لے آئی۔ انہوں نے کہا کہ گرین بسیں وزیراعلی مریم نوازاپنی حکومت کے پہلے 10 ماہ میں لائیں، لاہور کی سڑکوں پر 27گرین بسیں دوڑ رہی ہیں، آئندہ چند ماہ میں 500گرین بسیں مختلف شہروں کیلئے اور آجائیں گی، پنجاب کے اندر 700نئی سڑکیں بن رہی ہیں، وزیراعلی مریم نوازنے صوبے میں سٹیٹ آف دی آرٹ بی ایچ یوز بنائے ہیں۔
انہوں نے کہا کہ تحریک انصاف والوں کو مریم نواز کی کارکردگی سے بہت تکلیف ہورہی ہے، سپیڈو بس پر بھی سوشل میڈیا پر منفی مہم چلائی جارہی ہے،یہ بس شہبازشریف کے دور کی ہے۔
انہوں نے کہا کہ مریم نواز نے ایک سال میں 90سے زائد منصوبے شروع کئے، کسان کارڈ، ایئرایمبولنس اور دھی رانی جیسے پروگرامز عوام کی ضرورت ہیں، مریم نواز نے ایک سال میں 100گھروں کی چابیاں لوگوں کو دیں،10 ہزار گھر تکمیل کے آخری مرحلے میں ہیں، مریم نواز نے اپنی کارکردگی سے عوام کے دلوں میں جگہ بنائی ہے ۔
