تاشقند: وزیراعظم شہباز شریف نے کہا ہے کہ ازبکستان کیساتھ درست سمت گامزن تعلقات کو مزید فروغ دینے کے خواہاں ہیں، دونوں ممالک کی خوشحالی و ترقی مشترکہ عزم ہے، انتھک محنت سے ہی ترقی کا سفر طے کیا جاسکتا ہے،افغانستان میں امن و استحکام خطے کے مفاد میں ہے،افغان عبوری حکومت اپنی سرزمین پاکستان کیخلاف استعمال ہونے سے روکے جبکہ ازبک صدر شوکت مرزا یوف نے کہا ہے کہ پاکستان کیساتھ تجارتی حجم 2ارب ڈالر تک بڑھائینگے، درپیش چیلنجز سے نمٹنے کیلئے مشترکہ لائحہ عمل ،مواقع سے فائدہ اٹھایا جائے گا،علاقائی وعالمی فورمز پر ایک دوسرے سے تعاون جاری رکھیں گے۔
تاشقند میں ازبک صدر کے ہمراہ مشترکہ پریس کانفرنس کرتے ہوئے وزیراعظم شہباز شریف نے کہا کہ دورہ ازبکستان کے دوران بہترین میزبانی پر ازبک صدر کا مشکور ہوں،پاکستان اور ازبکستان کے تعلقات کی طویل تاریخ ہے، دونوں ممالک کے درمیان مضبوط روابط قائم ہیں اور تعلقات درست سمت میں آگے بڑھ رہے ہیں جنہیں مزید فروغ دینے کے خوہاں ہیں۔
انہوں نے کہا کہ سرمایہ کاری و تجارت میں اضافہ دونوں ممالک کے مفاد میں ہے، ازبکستان،پاکستان کا قابل اعتماد شراکت دارہے، دونوں ممالک کی خوشحالی اور ترقی ہمارا مشترکہ عزم ہے۔ انہوں نے کہا کہ صدرشوکت مرزایوف عملی اقدامات پر یقین رکھتے ہیں، ازبک صدرنے ازبکستان کو ترقی کی نئی بلندیوں پر پہنچایا ہے۔
انہوں نے کہا کہ نوازشریف کی ترقی کے ویژن پر عمل پیرا ہوں، ہم پاکستان کی معاشی ترقی کیلئے پرعزم ہیں، انتھک محنت اور عزم سے ہی ترقی کا سفر طے کیا جاسکتا ہے۔ انہوں نے بتایا کہ ہم نے پاکستانی معیشت کو اپنے پیروں پر کھڑا کیا ہے، پالیسی ریٹ میں کمی سے سرمایہ کاروں کا اعتماد بڑھا ہے جبکہ معاشی شرح نمو میں اضافہ ہو رہا ہے۔انہوں نے بتایا کہ ہم ملک میں مہنگائی کی شرح 38فیصد سے 2.4فیصد پر لے آئے ہیں۔
انہوں نے بتایا کہ ملکی آئی ٹی برآمدات میں اضافہ ہو رہا ہے، ترقی کے سفر میں بہت سے مشکلات کا سامنا کرنا پڑتا ہے،ازبکستان کے ترقیاتی ماڈل سے مستفید ہوں گے، مختلف شعبوں میں تعاون سے دو طرفہ تعلقات بھی مزید مضبوط ہوں گے۔
انہوںنے بتایا کہ ازبک صدر سے خطے ومشرق وسطی کی صورتحال پر بات ہوئی ہے، افغان سرزمین پاکستان سمیت کسی ملک کیخلاف استعمال نہیں ہونی چاہئے، افغان عبوری حکومت اپنی سرزمین پاکستان کیخلاف استعمال ہونے سے روکے کیونکہ افغانستان میں امن و استحکام خطے کے مفاد میں ہے۔انہوں نے بتایا کہ پاکستان اور ازبکستان کے درمیان بات چیت آگے بڑھانے کیلئے وفد ایک دو روز میں تاشقند پہنچے گا، ازبک صدر کو بھی وفد پاکستان بھیجنے کا کہا ہے۔
وزیراعظم نے ازبک صدر کو دورہ پاکستان کی دعوت بھی دی جو انہوں نے قبول کرلی۔ اس موقع پر ازبک صدر شوکت مرزا یوف نے کہا کہ وزیراعظم شہبازشریف کو خوش آمدید کہتے ہیں،دونوں ملکوں کے درمیان مفید گفتگو ہوئی ہے، روشن مستقبل کیلئے دونوں ممالک کی گفتگواورمعاہدے بہت اہم ہیں، درپیش چیلنجز سے نمٹنے کیلئے مشترکہ لائحہ عمل اورمواقع سے فائدہ اٹھایا جائے گا۔
انہوں نے کہا کہ پاکستان کے خوشحال مستقبل کیلئے نیک تمناؤں کا اظہارکرتا ہوں، دونوں ممالک کے تعلقات میں وقت گزرنے کے ساتھ بہتری آرہی ہے، پاکستان کی ممتازکاروباری کمپنیاں دورہ تاشقندپر ہیں، سرمایہ کاری وتجارت کے حوالے سے سیر حاصل گفتگو ہورہی ہے۔
انہوں نے کہا کہ دونوں ممالک کے درمیان تزویراتی تعلقات کے نئے باب کا آغاز ہورہا ہے، بات چیت کے بعددونوں ممالک نے مفاہمتی یادداشتوں اورمعاہدوں پر دستخط کئے، دونوں ملکوں کے درمیان تجارتی حجم 2ارب ڈالر تک بڑھایا جائے گا، علاقائی وعالمی فورمز پر ایک دوسرے سے تعاون جاری رکھیں گے۔
