کراچی: چیئرمین پیپلز پارٹی بلاول بھٹو نے کہا ہے کہ سیاسی طور پر کسی کو نشانہ بنانے کے حامی ہیں نہ ریاستی اداروں کو اس مقصد کیلئے استعمال ہونا چاہئے، ہمیشہ نیب کے نظام احتساب کی مخالفت کی، بانی پی ٹی آئی نے اپنے دور میں سیاسی قیدیوں کیلئے جیل مینو تک تبدیل کیا ، اب مینوتبدیلی، سہولیات فراہمی کی استدعاء ہو رہی ہے ۔آکسفورڈ یونین سے خطاب کرتے ہوئے بلاول بھٹو نے کہا کہ پاکستان سمیت دیگر ممالک کو جمہوریت سے متعلق مختلف چیلنجز کا سامنا ہے۔
انہوں نے کہا کہ پیپلزپارٹی جمہوریت پر یقین رکھتی ہے ، ہمارا میثاق جمہوریت میں اہم کردار تھا۔ انہوں نے کہا کہ ہم نے اپنے دور میں اپوزیشن کو مصروف رکھا، قومی سیاست میں ضرورت پڑنے پر پیپلزپارٹی نے ہی ساتھ دیا ہے۔ انہوں نے کہا کہ ماضی میں احتساب کے نام پر پیپلز پارٹی کو نشانہ بنایاجاتارہا، آصف زرداری پہلی بار منتخب ہوئے تو کوئی سیاسی قیدی نہیں تھا، بانی پی ٹی آئی کے دور میں میری پھپھو کو گرفتار کیاگیا،شہبازشریف و دیگر سیاسی لوگ بھی گرفتار ہوئے مگر ہم سیاسی طور پر کسی کو بھی نشانہ بنانے کے حامی نہیں، مسائل کے حل کیلئے پیپلزپارٹی مذاکرات پر یقین رکھتی ہے، بانی پی ٹی آئی کے دور میں سیاسی قیدیوں کیلئے جیل مینو تک تبدیل کیاگیا، اب جیل مینو کی تبدیلی اور سہولیات فراہمی کی استدعاہورہی ہے۔
انہوں نے کہا کہ آصف زرداری نے بطورسیاسی قیدی طویل عرصہ جیل میں گزارامگر جب پیپلز پارٹی اقتدار میں آئی تو ہم نے کہا جمہوریت بہترین انتقام ہے ہم نے ہمیشہ نیب کے نظام احتساب کی مخالفت کی ، ہم سمجھتے ہیں اداروں کو سیاسی انتقام کیلئے استعمال نہیں ہونا چاہئے۔
