لاہور: وزیر اطلاعات پنجاب عظمی بخاری نے کہا ہے کہ جن کی کارکردگی کچھ بتانے لائق نہ ہو وہ دوسروں کے اچھے کامو ں سے کیڑے نکالتے ہیں، خیبرپختونخوا میں آج بھی لوگ ندی نالوں سے ڈولیوں میں اور بائیکس کو ندیوں سے عبور کرتے ہیں۔
مشیر اطلاعات خیبر پختونخوا بیرسٹر سیف کے بیان پر ردعمل دیتے ہوئے عظمی بخاری نے کہا کہ بائیکر لین کا رنگ لوکل کمپنی نے ایک سال کی گارنٹی پر ٹیسٹ کے طور پرلگایا تھا، اب وہی کمپنی دوبارہ بائیکر لین کا رنگ کرے گی۔
انہوں نے کہا کہ اس کام میں پنجاب حکومت کا ایک دھیلے کا بھی نقصان نہیں ہوا نہ ہی اس مد میں کوئی ادائیگی کی گئی ہے۔ انہوں نے کہا کہ پشاور کی بی آر ٹی پچھلے 5سال میں چلی کم، جلی زیادہ اور حادثات کا شکار ہوئی، پشاور میٹرو کے آج بھی خیبرپختونخوا حکومت نے 60ارب روپے ادا کرنے ہیں،کیس آج بھی عالمی عدالت میں چل رہا ہے۔
انہوں نے کہا کہ بیرسٹر سیف ہمیشہ پنجاب پر تنقید کر کے خبروں میں زندہ رہنے کی بھونڈی کوشش کرتے ہیںانہوں نے آج تک قوم کو اپنے وزیراعلی کی کارکردگی نہیں بتائی۔انہوں نے کہا کہ خیبرپختونخوا میں آج بھی لوگ ندی نالوں سے ڈولیوں میں اور بائیکس کو ندیوں سے عبور کرتے ہیں۔
انہوں نے کہا کہ پنجاب میں میٹرو بس، اورنج ٹرین کے بعد اب ٹرام اور انڈر گرائونڈ گرین لائن بننے جا رہے ہیں جس سے شہریوں کو بین الاقوامی معیار کی سفری سہولیات ملیں گی۔انہوں نے کہا کہ جن کی اپنی کارکردگی بتانے لائق نہ ہو، وہ دوسروں کے اچھے کاموں میں کیڑے نکالتے ہیں۔
