پشاور: مشیر اطلاعات خیبرپختونخوا بیرسٹر سیف نے عمران خان سے ملاقات پر پابندی کے خاتمے کا مطالبہ کرتے ہوئے کہاہے کہ قید میں موجود شخص نے جعلی حکومت کی نیندیں حرام کر رکھی ہیں،عمران خان نواز شریف کی طرح کسی ڈیل کا حصہ نہیں بنیں گے۔
جاری بیان میں بیرسٹر سیف نے کہا کہ قید میں موجود ایک شخص نے جعلی حکومت کی نیندیں حرام کر رکھی ہیں، عمران خان سے ملاقاتوں پر پابندی جعلی حکومت کے ہوش و حواس کھونے کا واضح ثبوت ہے۔
انہوں نے کہا کہ ملاقاتوں پر پابندی اور دیگر سختیوں کا مقصد عمران خان پر دبا ؤڈال کر انہیں کسی ڈیل کیلئے مجبور کرنا ہے، مگر جعلی حکومت یہ بات ذہن نشین کر لے کہ عمران خان، نواز شریف کی طرح کسی ڈیل کا حصہ نہیں بنیں گے۔ انہوں نے کہا کہ مینڈیٹ چور حکومت نہ صرف بنیادی انسانی حقوق پامال کر رہی ہے بلکہ توہین عدالت کی بھی مرتکب ہو رہی ہے۔
انہوں نے کہا کہ مریم نواز کے قول و فعل میں تضاد واضح ہو چکا ،روزانہ جلسوں میں عمران خان کو سہولیات دینے کی بات تو کی جاتی ہے، مگر حقیقت اس کے برعکس ہے۔ انہوں نے کہا کہ ملاقاتوں پر پابندی شکوک و شبہات کو جنم دے رہی ہے اقدام سے کارکنوں میں تشویش کی لہر دوڑ گئی ہے۔ انہوں نے مطالبہ کیا کہ ملاقاتوں پر پابندی فوری ختم کی جائے۔
