ریاض: وفاقی وزیراطلاعات عطا اللہ تارڑ نے غیر مستند خبروں اور غلط معلومات کی حوصلہ شکنی کیلئے عالمی شراکت داری پر زور دیتے ہوئے کہا ہے کہ حقائق کی تصدیق کیلئے جامع، مستند و معتبر نظام ناگزیر ہے ،سعودی عرب کا وژن 2030ء عملی شکل اختیار کر چکا ہے، غزہ جیسے عالمی مسائل پر حقیقی معلومات کی فراہمی ضروری ہے، وقت آگیا نئے معاہدے کر کے اشتراک بڑھایا جائے۔
سعودی عرب کے دارالحکومت ریاض میں سعودی میڈیا فورم 2025ء کے زیراہتمام مباحثے سے خطاب میں عطاء تارڑ غلط معلومات اور جھوٹی خبروں کا پھیلاؤ روکنے کیلئے ٹھوس اقدامات ناگزیر قرار دیتے ہوئے کہا کہ غیر مستند خبریں اور غلط معلومات سب سے بڑا خطرہ اور چیلنج ہیں ،ہمیں اس کا حل تلاش کرنے کی ضرورت ہے۔
انہوں نے کہا کہ عالمی سطح پر ایک ایسا ادارہ ہونا چاہئے جہاں مصنوعی ذہانت کے ذریعے حقائق کی جانچ کا نظام موجود ہو، سوشل میڈیا پر مصنوعی ذہانت کا استعمال منصفانہ ہونا چاہئے اسے کسی ایک جانب نہیں جھکایا جا سکتا۔ انہوں نے کہا کہ حقائق کی تصدیق کیلئے جامع، مستند اور معتبر نظام ناگزیر ہے جس پر لوگ بھروسہ کر سکیں۔
انہوں نے کہا کہ عالمی میڈیا اداروں کے مقامی میڈیا کیساتھ تعاون اور اشتراک کیلئے تیار ہیں، ایسی شراکت داری سے شفافیت کی حوصلہ افزائی ہوگی۔انہوں نے کہا کہ ہمیں ایسے میڈیا کی ضرورت ہے جو سماجی مسائل پر روشنی ڈالے اور لوگوں کو اپنی بات کہنے کا موقع فراہم کرے۔ انہوں نے کہا کہ عالمی شراکت داری کے ذریعے مقامی میڈیا اداروں میں مثالی تبدیلی لائی جا سکتی ہے۔
انہوں نے کہا کہ غزہ جیسے عالمی مسائل کے بارے میں صحیح اور حقیقی معلومات کی فراہمی ضروری ہے تاکہ دنیا وہاں ہونے والے مظالم سے آگاہ ہو سکے۔ انہوں نے کہا کہ پاکستان کے پاس بہترین نیوز چینلز، تفریحی چینلز، فلم سازی اور دستاویزی فلمیں بنانے کی بھرپور صلاحیت موجود ہے،اب وقت آ گیا ہے کہ نئے معاہدے کئے جائیں اشتراک بڑھائیں اور عالمی میڈیا پر اپنی شناخت بنائیں۔
انہوں نے کہا کہ سعودی عرب میں وژن 2030ء کے تحت رونما ہونیوالی تاریخی تبدیلیوں کا مشاہدہ کر کے خوشی ہوئی، وژن 2030ء ایک خواب نہیں بلکہ عملی شکل اختیار کر چکا ہے، سعودی ولی عہد شہزادہ محمد بن سلمان کی قیادت میں ایک عظیم انقلاب آ چکا ہے۔
