اسلام آباد: پی ٹی آئی رہنما ورکن قومی اسمبلی علی محمد خان نے گستاخانہ مواد کے خلاف کمیشن بنانے کی مخالفت کرتے ہوئے کہا ہے کہ کمیشن کے بجائے حکومت خود استغاثہ بن کر مقدمات دائر کرے، گزشتہ کافی عرصے سے سوشل میڈیا پر گستاخانہ مواد سامنے آرہا ہے، حکومتِ وقت اس عمل کا سخت نوٹس لے، ختم نبوت پر اس ملک میں قانون پاس ہوچکا ہے ،حکومت اس معاملے میں کمیشن کی طرف نہ جائے۔
قومی اسمبلی میں اظہار خیال کرتے ہوئے انہوں نے کہا کہ کمیشن بننے سے گستاخی کے مرتکب ملزمان بیرون ملک جاکر پھر توہین کریں گے، عدالتوں میں ہی توہین سے متعلق مقدمات چلنے دیئے جائیں تاکہ اوپن کورٹ میں سب کو صفائی کا موقع دیا جاسکے۔
انہوں نے کہا اسلام آباد ہائی کورٹ کے ایک جج نے حکومت کو توہین سے متعلق مقدمات میں کمیشن بنانے کی تجویز دی ہے، کمیشن کی تجویز پر حکومت عمل نہ کرے، کمیشن بنا تو خدانخواستہ توہین و گستاخی کے مقدمات کمزور ہوں گے۔
