لاہور: صدر مسلم لیگ (ن) نواز شریف نے کہا ہے کہ ترقی کرتے ملک کو پٹڑی سے اتارنا بدقسمتی ،سیاست میں گند ڈال کر تباہ کیا گیا،ہمارا بیانیہ ملکی ترقی ،عوام کو مہنگائی سے نجات دلاکر خوشحال بنانا ہے، پالیسیوں کے تسلسل سے معاشی ترقی یقینی ہوگی۔
پیر کو صدر مسلم لیگ (ن) نواز شریف اور وزیراعلی پنجاب مریم نواز سے ساہیوال، خانیوال، ملتان ، لودھراں، وہاڑی اور بہاولنگر ڈویژن سے تعلق رکھنے والے ارکان پنجاب اسمبلی نے ملاقات کی۔ اس موقع پر گفتگو کرتے ہوئے لیگی صدر نے کہا کہ ترقی کرتے ملک کو پٹڑی سے اتارنا بدقسمتی ہے ،سیاست میں گند ڈال کر اسے تباہ کیا گیا، بد تہذیبی، بدتمیزی ،بغض اور انتقام کوسیاست بنادیا گیا ہے ۔
انہوں نے کہا کہ آئی ایم ایف واپس آیا ہے حالانکہ ہم نے اسے خدا حافظ کہہ دیا تھا، ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے، جو وعدے کئے تھے اللہ تعالی کے فضل وکرم سے وہ آج عوام کو پورے ہوتے نظر آرہے ہیں۔
انہوں نے کہا کہ پالیسیوں کے تسلسل سے معاشی ترقی یقینی ہوگی۔ اس موقع پر ارکان اسمبلی نے گفتگو کرتے ہوئے کہا کہ نوازشریف اور شہبازشریف وعدوں کی تکمیل، وطن سے وفا کے نام ہیں،قائدین نے ذاتی تکالیف بھلا کر ہمیشہ پاکستان اور عوام کی تکلیفیں دور کی ہیں، پاکستان کے چپے چپے پر نوازشریف اور شہبازشریف کی ترقی کے نشان موجود ہیں۔
انہوں نے کہا کہ وزیراعظم شہباز شریف نے پاکستان کے معاشی استحکام کیلئے ‘شہباز سپیڈ’سے کام کیا ہے، وزیراعظم کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا، مریم نوازنے نوازشریف اور شہبازشریف دور کی یاد تازہ کردی ہے۔
