اسلام آباد: وزیرِ اعظم محمد شہباز شریف نے کہا ہے کہ دہشتگرد بلوچستان کی تعمیر و ترقی کے دشمن ہیں ،دہشتگردوں کے ناپاک عزائم کو کامیاب نہیں ہونے دیں گے۔
اتوار کو وزیر اعظم آفس کی جانب سے جاری بیان کے مطابق وزیرِ اعظم نے قلات میں لیویز پوسٹ پر دہشتگرد حملے کی شدید الفاظ میں مذمت کی اور حملے میں شہید ہونے والے اہلکار علی نواز کو خراج عقیدت بھی پیش کیا۔وزیرِ اعظم نے کہا کہ لیویز اہلکار نے وطن کی حفاظت کی خاطر اپنی جان کا نذرانہ پیش کیا ہے۔
وزیر اعظم نے کہا کہ وطن کے امن کی خاطر جان قربان کرنے والے علی نواز شہید کو سلام پیش کرتے ہیں۔ وزیرِ اعظم نے شہید کے بلندی درجات اور اہل خانہ کیلئے صبر اور حملے میں زخمی ہونے والے اہلکاروں کی جلد صحت یابی کی دعاکی۔
