بہاولپور: آرمی چیف جنرل سید عاصم منیر نے کہا ہے کہ گرین کارپوریٹ منصوبے کے تحت مختصر وقت میں کامیابیاں حوصلہ افزا ،ترقی کی نوید ہیں،پاک فوج ملکی معاشی ترقی کے عمل میں بھرپور حمایت جاری رکھے گی۔ہفتے کو آرمی چیف جنرل سید عاصم منیر اور وزیراعلی پنجاب مریم نواز نے ایس آئی ایف سی کے گرین کارپوریٹ انیشی ایٹو کا دورہ کیا ، اس موقع پر دیگر وفاقی و صوبائی وزراء و زرعی شعبے سے متعلق افسران بھی پر موجود تھے۔
آرمی چیف جنرل عاصم منیر اور وزیر اعلی مریم نواز نے سمارٹ ایگری فارم،گرین ایگری مالزاور ایگری ریسرچ سہولت سنٹرکا باقاعدہ افتتاح کیا، دورے کے دوران شرکا کو زرعی شعبے کی ترقی کیلئے استعمال ہونیوالی جدید زرعی مشینری کا معائنہ بھی کرایا گیا۔
منصوبے کے تحت کسانوں کو مہنگی مشینری خریدنے کی بجائے آسان کرائے پر مشینری حاصل کرنے کے مواقع میسرہوں گے ، جدید آبپاشی کے نظام کیلئے پنجاب بھر میں 25گرین ایگری مال تیار کئے گئے ہیں، سال کے اختتام تک ملک بھر میں 250گرین ایگری مال کی تکمیل متوقع ہے۔
منصوبے کے تحت پانچ ہزار ایکڑ پر مشتمل جدید زرعی فارم کا بھی آغاز ہو گیا، گرین ایگری مال اینڈ سروسز سروس کمپنی کسانوں کو ان کے گھر کی دہلیز پر معیاری بیج، کھاد، کیڑے مار ادویات رعایتی قیمت پر فراہم کرے گی ،کسانوں کو ڈرونز سمیت زرعی مشینری رعایتی کرائے پر دستیاب ہو گی۔
اس موقع پر آرمی چیف جنرل سید عاصم منیر نے خطاب کرتے ہوئے کہا کہ پنجاب پاکستان کا زرعی پاور ہاؤس بن گیا ، جدید زراعت میں صوبہ پنجاب اور یہاں کے کسانوں کا قائدانہ کردار قابل تحسین ہے۔ انہوں نے کہا کہ گرین کارپوریٹ منصوبے کے تحت مختصر وقت میں کامیابیاں حوصلہ افزا اور ترقی کی نوید ہیں، پاک فوج ملک کی معاشی ترقی کے عمل میں بھرپور حمایت جاری رکھے گی۔
