پشاور: وزیراعلی خیبرپختونخوا علی امین گنڈا پور نے کہا ہے کہ عدم تحفظ ،حسد کے باعث لوگ تباہ ہورہے ، کسی کی کامیابی پر خوش ہونا چاہئے، خیبرپختونخوا کے عوام کی بہتری کیلئے کوئی کسر نہیں چھوڑیں گے۔ پشاور میں میڈیا سے گفتگو کرتے ہوئے علی امین گنڈا پور نے کہا کہ کچھ وجوہات کی بنا پر پاکستان ویسی ترقی نہیں کرسکا جس طرح کی بنیاد رکھی گئی تھی، انسانی حقوق کا خیال رکھنے والی قومیں اورملک ہی آگے بڑھتے ہیں ،کامیاب وہی ہوتا ہے جو کسی اور کی کامیابی پر خوش ہو۔
انہوں نے کہا کہ بانی پی ٹی آئی کو ملا تو ان سے بات چیت کے دوران کہا دو چیزیں بیماری ہیں جن کو کوئی بیماری نہیںسمجھتا ، عدم تحفظ اور حسد کی وجہ سے بہت سے لوگ اپنے اندر تباہ ہورہے ہوتے ہیں اس کا علاج نہیں کراتے، کوئی کامیاب ہورہا ہے تو اس پر خوش ہونا چاہئے۔
انہوں نے کہا کہ بانی پی ٹی آئی پوری ریاست کی مخالفت کے باوجود قوم اور بچوں کیلئے مقابلہ کررہے ہیں، ان کے وژن کے مطابق ہمارا ریونیو 55 فیصد بڑھ گیا ہے۔ انہوں نے کہا کہ خیبرپختونخوا میں ہر محکمے کی بہتری کیلئے کام کریں گے، عوام کی بہتری کیلئے کوئی کسر نہیں چھوڑیں گے۔
