راولپنڈی: شمالی وزیرستان میں سیکیورٹی فورسز کے آپریشن میں افغان دہشت گرد ہلاک ہوگیا۔آئی ایس پی آر کے مطابق 6فروری کو شمالی وزیرستان کے جنرل علاقے دتہ خیل میں آپریشن کے دوران دہشت گردی میں ملوث ایک افغان شہری مارا گیاجس کی شناخت لقمان خان عرف نصرت (افغان نیشنل)کے طور پر ہوئی ہے۔
ترجمان کے مطابق یہ دہشت گرد کمال خان کا بیٹا ہے جو سپیرا ڈسٹرکٹ خوست صوبہ، افغانستان کا رہائشی ہے۔ ترجمان کے مطابق افغان شہری ہونے کے ناطے اس شخص کی لاش کو تحویل میں لینے کیلئے عبوری افغان حکومت کے حکام سے رابطہ کیا جا رہا ہے، اس طرح کے واقعات پاکستان میں دہشت گردی کی سرگرمیوں میں افغان شہریوں کے ملوث ہونے کا ناقابل تردید ثبوت ہیں۔
آئی ایس پی آر نے کہا کہ توقع ہے کہ عبوری افغان حکومت اپنی ذمہ داریاں پوری کرے گی، دہشت گردوں کی جانب سے پاکستان کے خلاف دہشت گردی کی کارروائیوں کیلئے افغان سرزمین استعمال کرنے کی اجازت نہیں دے گی۔
