اسلام آباد: سپریم کورٹ نے آفیشل سیکریٹ ایکٹ اور آرمی ایکٹ میں 2023ء میں کی گئی ترامیم بارے عمران خان کی درخواست پر عائد اعتراضات ختم کر کے قابل سماعت ہونے بارے دلائل طلب کر لئے۔ جمعہ کو سپریم کورٹ میں جسٹس امین الدین خان کی سربراہی میں پانچ رکنی آئینی بینچ نے بانی پی ٹی آئی کی آفیشل سیکریٹ ایکٹ اور آرمی ایکٹ میں 2023ء میں کی گئی ترامیم بارے دائر درخواست پر سماعت کی ۔عدالت نے درخواست پر عائد اعتراضات ختم کرتے ہوئے رجسٹرار آفس کو درخواست پر باضابطہ نمبر الاٹ کرنے کی ہدایت کی۔
عدالت نے استفسار کیا بتایا جائے ترامیم کیخلاف پہلے ہائیکورٹ سے رجوع کیوں نہیں کیا گیا؟ وکیل شعیب شاہین نے کہا کہ آفیشل سیکریٹ ایکٹ اور آرمی ایکٹ ترامیم سے لوگوں کے حقوق متاثر ہو رہے ہیں۔جسٹس محمد علی مظہر نے ریمارکس دیئے کہ سپریم کورٹ آرٹیکل 184/3میں قوانین کے خلاف درخواستیں مرضی سے ہی سنتی رہی ہے، جو کیس دل کیا سن لیا جو نہ دل کیا کہہ دیا پہلے ہائی کورٹ جائیں، براہ راست درخواستیں سنتے رہے تو آرٹیکل 199غیرموثر ہو جائے گا۔
وکیل شعیب شاہین نے کہا کہ یہ فیصلہ رجسٹرار نہیں عدالت کر سکتی ہے۔بعد ازاں عدالت نے سماعت غیر معینہ مدت تک ملتوی کرتے ہوئے درخواست کے قابل سماعت ہونے پر دلائل طلب کر لئے۔
