اسلام آباد: وزیراعظم کے مشیر برائے سیاسی امور رانا ثنا اللہ نے کہا ہے کہ سیاستدانوں کے ساتھ بیٹھنے سے معاملات الجھیں نہیں سلجھیں گے، ایسا نہیں ہوتا کسی کا مطالبہ من وعن تسلیم کرلیا جائے، کچھ مانا جاتا، کچھ منوایا جاتا ہے۔
نجی ٹی وی سے گفتگو کرتے ہوئے راناثنا ء اللہ نے کہا کہ مولانا فضل الرحمن کو 26ویں آئینی ترمیم میں ساتھ لے کر چلے، ہم ان کے بغیر آئینی ترمیم کیلئے آگے نہیں بڑھے۔انہوں نے کہا کہ جو بھی مطالبات ہیں، ان پر سیاستدانوں کو بیٹھنا چاہئے، سیاست دان اگر آپس میں بیٹھیں گے تو معاملات سلجھیں گے الجھیں گے نہیں۔
انہوں نے کہا کہ ابتدا میں ہم سے تھوڑی سی کوتاہی ہوئی تاہم ہم نے اس کا ازالہ کیا، مولانا فضل الرحمن اور دیگر سیاستدانوں سے بھی بات ہو گی۔ انہوں نے کہا کہ ایسا نہیں ہوتا کسی کا مطالبہ من و عن مان تسلیم کر لیں، کچھ مانا جاتا ہے کچھ منوایا جاتا ہے۔
انہوں نے کہا کہ ہم پرانے دوستوں کو نہیں بھولے، ہمیشہ سے یاد ہیں،جب بھی ضرورت پڑی مفتاح اسماعیل اور شاہد خاقان ہمارے پاس آسکتے ہیں، ہم ان کے پاس جا سکتے ہیں۔
