اسلام آباد: وزیراعظم شہباز شریف نے واضح کیا ہے کہ حق خود ارادیت کے حصول تک جموں و کشمیر تنازعہ پاکستان کی خارجہ پالیسی کا اہم ستون رہے گا،کشمیری عوام کی حقیقی امنگوں کی نمائندگی کرنیوالی سیاسی جماعتوں پر پابندی کا مقصد اختلاف رائے کو کچلنا ہے،عالمی برادری عوام کو آزادانہ طور پر اپنے مستقبل کا فیصلہ کرنے کی اجازت دے۔
یوم یکجہتی کشمیر پر جاری بیان میں وزیراعظم نے کہا کہ پاکستانی حکومت اور عوام کشمیری عوام کے حق خودارادیت کے حصول ،منصفانہ و جائز جدوجہد کی مستقل حمایت کی تجدید کیلئے ہر سال یوم یکجہتی کشمیر مناتے ہیں ۔ انہوں نے کہا کہ حق خود ارادیت بین الاقوامی قانون کا ایک بنیادی اصول ہے، ہر سال اقوام متحدہ کی جنرل اسمبلی ایک قرارداد منظور کرتی ہے جس میں لوگوں کو اپنے مستقبل کے فیصلے خود کرنے کے قانونی حق پر زور دیا جاتا ہے، تاہم امر پر افسوس ہے کہ کشمیری عوام 78سال گزرنے کے باوجود اس ناقابل تنسیخ حق کو استعمال نہیں کر سکے۔
وزیراعظم نے کہا کہ بھارت کے غیر قانونی زیر تسلط جموں و کشمیر دنیا کے سب سے بڑے قابض فوجی علاقوں میں سے ایک ہے، کشمیری خوف اور دہشت کے ماحول میں جی رہے ہیں، سیاسی کارکنوں اور انسانی حقوق کے محافظوں کو طویل حراست میں رکھا جا رہا ہے اور ان کی جائیدادیں ضبط کی جا رہی ہیں۔انہوں نے کہا کہ کشمیری عوام کی حقیقی امنگوں کی نمائندگی کرنے والی سیاسی جماعتوں پر پابندی لگا دی گئی ہے، ان جابرانہ اقدامات کا مقصد اختلاف رائے کو کچلنا ہے۔
انہوں نے کہاکہ بھارت جموں وکشمیر پر اپنے غیر قانونی قبضے کو مستحکم کرنے کیلئے غیر قانونی اقدامات کر رہا ہے، 5اگست 2019ء کے غیر قانونی اور یکطرفہ اقدامات کے بعد بھارت کی کوششوں کا مقصد اپنے غیر قانونی زیر تسلط جموں و کشمیر کی آبادی اور سیاسی ماحول کو تبدیل کرنا ہے تاکہ کشمیری اپنی ہی سرزمین میں ایک بے اختیار کمیونٹی میں تبدیل ہو جائیں۔
وزیراعظم نے کہاکہ مشرق وسطی کی حالیہ پیش رفت اس بات کو ظاہر کرتی ہے کہ دیرینہ تنازعات کو مزید طول نہیں دیا جانا چاہئے، مقامی لوگوں کی حقیقی امنگوں کو دبا کر دیرپا امن حاصل نہیں کیا جا سکتا۔انہوں نے کہا کہ عالمی برادری کو جنوبی ایشیا میں پائیدار امن کے مفاد میں بھارت پر زور دینا چاہئے کہ وہ کشمیری عوام کو آزادانہ طور پر اپنے مستقبل کا فیصلہ کرنے کی اجازت دے۔
وزیراعظم نے کہا کہ آج کے دن کی مناسبت سے اس بات کا اعادہ کرنا چاہتا ہوں کہ جموں و کشمیر کا تنازعہ پاکستان کی خارجہ پالیسی کا ایک اہم ستون رہے گا ۔انہوں نے کہا کہ پاکستان کشمیری عوام کے اقوام متحدہ کی سلامتی کونسل کی متعلقہ قراردادوں کے مطابق حق خودارادیت کے حصول تک ان کی غیر متزلزل اخلاقی، سفارتی اور سیاسی حمایت جاری رکھے گا۔
وزیراعظم نے کہا کہ میں بہادر کشمیری عوام کے عزم اور حوصلے کو سلام پیش کرتا ہوں جو اپنے بنیادی حقوق اور آزادیوں کے حصول کیلئے اپنی جدوجہد میں لاتعداد قربانیاں دے رہے ہیں ۔
