پشاور: مشیر اطلاعات خیبر پختونخوا بیرسٹر سیف نے کہا ہے کہ حکمران کالے قوانین کے ذریعے اقتدار کو طول دینے کی ناکام کوشش کررہے ہیں، پیکا ایکٹ اور 26ویں ترمیم جعلی حکمرانوں کے گلے پڑیں گے۔جاری بیان میں بیرسٹر سیف نے کہا کہ جعلی حکومت نامکمل پارلیمنٹ سے کالے قوانین پاس کر رہی ہے،8فروری کو پیکا ایکٹ اور 26ویں ترمیم سمیت تمام غیر قانونی ہتھکنڈوں کے خلاف آواز اٹھائینگے۔
انہوں نے کہا کہ پیکا ایکٹ اور 26ویں ترمیم 8فروری کے الیکشن پر ڈاکے کے تحفظ کی کوشش ہے،ایکٹ اور قانون جعلی حکمرانوں کے گلے پڑیں گے۔انہوں نے کہا کہ 8فروری کو فارم 47 کا استعمال کر کے جمہوریت پر شب خون مارا گیا۔
انہوں نے کہا کہ صحافیوں سمیت ہر شعبہ اور مکتبہ فکر کو 8فروری کے احتجاج میں شرکت کی دعوت ہے، حکومت کالے قوانین کے ذریعے اپنے اقتدار کو طول دینے کی ناکام کوشش کر رہی ہے۔ انہوں نے کہا کہ 8فروری ملک کو مینڈیٹ چوروں کے چنگل سے آزاد کرانے کے عہد کا دن ہے۔
