بیجنگ(شِنہوا)چین کے وزیر خارجہ وانگ یی نے بیجنگ پرفارمنگ آرٹس سنٹر میں چینی وزارت خارجہ کے زیراہتمام نئے سال 2025 کی استقبالیہ تقریب کی میزبانی کی۔
تقریب میں کمیونسٹ پارٹی آف چائنہ (سی پی سی) کی مرکزی کمیٹی کے سیاسی بیورو کے رکن اور سی پی سی بیجنگ میونسپل کمیٹی کے سیکرٹری ین لی کے علاوہ مختلف ممالک کے سفیروں، چین میں بین الاقوامی تنظیموں کے نمائندوں اور چینی سرکاری محکموں کے نمائندوں نے شرکت کی۔ مجموعی طور پر تقریباً 400 افراد نے تقریب میں شرکت کی۔
وانگ یی نے کہا کہ چین کی خارجہ خدمات نے انسانیت کے مشترکہ مستقبل کے حامل معاشرے کی تعمیر کا علم بلند رکھا ہے، امن کے لئے جدوجہد کی ہے اور ترقی کے لئے اپنی ذمہ داری کو پورا کیا ہے۔ انہوں نے مزید کہا کہ چین کی سفارتی کوششوں سے شورش زدہ دنیا میں مزید استحکام اور مثبت توانائی آئی ہے۔
انہوں نے کہا کہ گزشتہ ایک سال کے دوران سفیروں اور بین الاقوامی تنظیموں کے نمائندوں نے چین کے مختلف حصوں کا دورہ کیا ہے تاکہ لوگوں کے درمیان دوستی کے پل تعمیر کئے جاسکیں۔
چین تمام ممالک کے ساتھ مل کر پوری دنیا کی فلاح و بہبود کو مدنظر رکھے گا اور اختلافات اور تنازعات سے بالاتر ہوگا۔ انہوں نے کہا کہ آئیے مل کر دوستی اور تعاون کو فروغ دیں، مختلف ثقافتوں کے درمیان باہم سیکھنے کو فروغ دیں اور انسانیت کے مشترکہ مستقبل کے حامل معاشرے کی تعمیر کریں۔
چین میں غیر ملکی سفارتی کور کے ڈین اور چین میں کیمرون کے سفیر مارٹن ایمپانا نے سفارتی عملے کی جانب سے چینی عوام کو نئے سال کی مبارک باد پیش کی۔
