اسلام آباد: وزیراعظم شہباز شریف نے کہا ہے کہ پاکستانی نوجوانوں میں تمام شعبہ ہائے زندگی میں لوہا منوانے ،ملک کا نام روشن کرنے کی صلاحیت موجود ہے،نوجوانوں کو عالمی مارکیٹ کے تقاضوں کے مطابق صلاحیتوں سے آراستہ کرنے کیلئے پر عزم ہیں۔جمعہ کو وزیراعظم شہباز شریف سے یونیورسٹی آف لندن کی وائس چانسلر وینڈی تھامسن نے ملاقات کی، اس موقع پر وزیر اطلاعات عطاء تارڑ، وفاقی وزیر اقتصادی امور احد خان چیمہ اور متعلقہ اداروں کے اعلی افسران بھی موجود تھے ۔
اس موقع پر گفتگو کرتے ہوئے وزیراعظم نے کہا کہ پاکستانی شہری یونیورسٹی آف لندن و دیگر معروف عالمی تعلیمی اداروں سے تعلیم حاصل کرنے کے بعد عالمی مارکیٹ میں اہم خدمات سرانجام دے رہے ہیں،پاکستانی نوجوانوں میں زندگی کے تمام شعبوں میں اپنا لوہا منوانے اور ملک کا نام روشن کرنے کی مکمل استعداد موجود ہے۔
انہوں نے کہا کہ حکومت نوجوانوں کو میرٹ کی بنیاد پر بیرون ملک سکالرشپ اور ملازمت کیلئے بھیجنے بارے متعدد پروگرام متعارف کر اچکی ہے جبکہ نئی حکمت عملیوں پر بھی کام جاری ہے۔
انہوںنے کہا کہ ہم اپنے نوجوانوں کو عالمی مارکیٹ کے تقاضوں کے مطابق صلاحیتوں سے آراستہ کرنے کیلئے پر عزم ہیں۔ اس موقع پر یونیورسٹی آف لندن کی وائس چانسلر وینڈی تھامسن نے وزیراعظم کو ملک میں تعلیم کے فروغ کیلئے اٹھائے گئے حالیہ اقدامات پر خراج تحسین پیش کیا۔
