لاہور: وزیراطلاعات پنجاب عظمی بخاری نے مریم نواز دیگر صوبوں کے وزرائے اعلی کیلئے رول ماڈل قرار دیتے ہوئے کہا ہے کہ مریم نواز کی نوجوانوں میں مقبولیت کی وجہ کارکردگی ہے، مخالفین کی توجہ اپنی کارکردگی پر کم مریم نواز پر کیچڑ اچھالنے میں زیادہ ہے۔
جاری بیان میں عظمی بخاری نے کہا کہ پنجاب میں ترقی، خوشحالی اور امن کا دور واپس آرہا ہے، مریم نواز نے وسطی پنجاب سے جنوبی پنجاب سے عوامی منصوبوں کا جال بچھادیا ہے، نوجوانوں میں ان کی مقبولیت کی وجہ کارکردگی ہے۔انہوں نے کہا کہ پنجاب میں کسان کارڈ، الیکٹرک بائیکس، سکالرشپ، دھی رانی پروگرام کامیابی سے جاری ہیں، نئی سڑکوں کی تعمیر ہورہی ہے ،الیکٹرک بسیں بھی آگئی ہیں۔
انہوں نے کہا کہ اپنی چھت اپنا گھر، کینسر کی مفت ادویات کی فراہمی مریم نواز کے تاریخی منصوبے ہیں، خوشحال پنجاب اور ستھرا پنجاب منصوبے بھی کامیابی سے آگے بڑھ رہے ہیں۔ انہوں نے کہا کہ چار سال پنجاب کے وسائل کو کپتان رجیم نے بے دردی سے لوٹا، مریم نواز پنجاب کے لوگوں سے چار سال کی گئی ناانصافیوں کا ازالہ کررہی ہیں،ہر طبقے کیلئے روز نئے منصوبے لائے جارہے ہیں۔
انہوں نے کہا کہ مریم نواز باقی صوبوں کے وزرائے اعلی کیلئے رول ماڈل ہیں، تاہم مخالفین کی توجہ اپنی کارکردگی پر کم مریم نواز پر کیچڑ اچھالنے میں زیادہ ہے۔
