لاہور: پنجاب اسمبلی سینیٹ انتخاب میں مسلم لیگ ن کے امیدوار حافظ عبدالکریم243 ووٹ لیکر کامیاب ہو گئے، حافظ عبدالکریم کے مد مقابل پاکستان تحریک انصاف کے امیدوار مہر عبدالستار تھے جبکہ خدیجہ صدیقی اور اعجاز منہاس آزاد امیدوار تھے۔
کسی بھی امیدوار کو کامیابی کے لئے 185 ووٹ درکار تھے، حکومتی امیدوار کو 261 جبکہ اپوزیشن کو 108 ووٹوں کی حمایت حاصل تھی، گنتی مکمل ہونے پر مسلم لیگ ن کے امیدوارحافظ عبدالکریم 243 ووٹ لے کر کامیاب ہو گئے۔
سینیٹ کی خالی نشست پر پولنگ صبح 9 بجے شروع ہوئی جو کہ شام 4 بجے تک جاری رہی، سینیٹ انتخابات کیلئے اراکین اسمبلی نے 345 ووٹ کاسٹ کئے ،مسلم لیگ ن کی جانب سے چیف وہپ رانا ارشد کو پولنگ ایجنٹ مقرر کیا گیا تھا جبکہ اپوزیشن کی جانب سے رانا شہباز نے پولنگ ایجنٹ کے فرائض سر انجام دیئے۔
پنجاب اسمبلی میں کل نشستوں کی تعداد 371 ہے جبکہ دو نشستیں خالی ہیں، الیکشن کیلئے کل ووٹوں کی تعداد 369 ہے۔ یاد رہے کہ مرکزی جمعیت اہلحدیث پاکستان کے امیر پروفیسر ساجد میر کی وفات کے بعد یہ نشست خالی ہوئی تھی۔
